Atletanan  Reginald Koc, Lixandra Geerman, Jelissa Nedd, Gregory v/d Linden y Naomi Cecilia lo ta tumando parti den un competencia na Corsow dia 26 y 27 di April. E competencia aki lo ta un competencia di qualification, lo no tin premio, pero atletanan lo competi pa asina mejora nan tempo pa nan por qualifica pa cierto eventonan international. 
 

Diaranzon atardi, Club di atletismo Olympia Track and Field a tene otro competencia den e deporte di atletismo pa tur club miembro di e federacion. Mester bisa cu un cantidad grandi di muchanan den tur edad a asisti na e competencia di Horden. Di parti bestuur di Olympia, nan ta gradici tur Club di Atletismo cu a manda nan atleta pa participa na Olympia su competencia di Horden.

No ta tur biaha bo ta haya competencianan pa mira manera esun di diaranzon ultimo. Ya pa varios anja, Club di atletismo Olympia ta organisa un competencia mayor y yui, unda mayornan a bin demostra nan talento scondi den e disciplinanan sprint como tambe core distancia medio.

Diaranzon atardi, IBISA a organisa e competencia di deporte escolar den atletismo pa muchanan di scol cu no ta miembro di un of otro club, esaki den e categorianan di  B,C en D mucha muher y homber. Mester bisa cu tur e ganadornan lo competi den e weganan interinsular di atletismo cu lo tuma lugar aki na Aruba mes. Nos tin e siguiente resultadonan di atletismo.