| 
“Mi ta desea pa mira Aruba sigui progresa riba tereno di e lucha contra dopahe” PDF Print E-mail
Wednesday, 25 March 2015
img_8561.jpg E bishita di trabou realisa pa e directora ehecutivo di e Caribbean Regional Anti-Doping Organisation Sra. Tessa Chaderton-Shaw (RADO) tabata uno extenso y sigur interesante.

Riba invitacion di Comite Olimpico Arubano, Sra. Chaderton tabata na Aruba pa asina reuni cu varios “stakeholders” riba e tema anti-doping. Resumiendo tur e reunionnan cu Sra. Chaderton tabata tin cu e diferente stakeholders den dos dia di tempo, nos por bisa cu RADO a reuni cu director di e Direccion Olimpismo di COA y alabes RADO Board Member pa Aruba den Caribe, Sr. Patrick Werleman. Hunto cu Sr. Werleman a repasa e programa di e bishita di RADO na Aruba. Tambe a intercambia di idea  y discuti e meta y plannan cu tin pa Aruba riba e tereno di dopahe. 
  Despues Sra. Chaderton a reuni cu miembronan di e Directiva Diario di COA, presidi pa su presidente, Sr. Edwin Roos, secretaria general, Sra. Nicole Hoevertsz, y tesorero, Sr. Jair Tromp.
  Aki a papia di e importancia pa COA sigui riba e bon caminda di Anti-Doping, tambe a discuti e preocupacion cu COA tin pa loke ta e gastonan di test e atletanan. A keda palabra cu ambos partido lo bay bek den nan seno pa mira kiko lo por haci pa yuda e federacionnan cu kier haci testnan di dopahe cu nan atletanan.
  Diahuebs anochi, aproximadamente riba 100 persona, entre nan atleta, entrenador, dirigente y mayornan, como tambe miembronan di directiva di diferente federacionnan y miembro di e diferente comisionnan di COA, a atende un anochi di informacion riba e topico Anti-Doping.  Na e anochi aki, Sra. Chaderton a presenta diferente topico manera e proceso di control di dopahe, substancianan cu ta riba e lista di dopahe y e peligernan cu e uso di esakinan ta trece cune, entre otro e “side effects”.  Tambe a papia di e metodonan cu atletanan sa usa pa comete fraude (Wizanator), e peliger di uso di bebidanan cu ta duna energia (energy drinks) y a repasa e proceso di test completo. 
  Mester bisa cu e ehecutivo di RADO a reuni tambe cu e mandatario di Aruba di deporte esta Minister di Salubridad Publico y Deporte, Dr. Alex Schwengle hunto cu representante di Ministerio di Deporte, Sra. Verouschka Croes.  E tabata un reunion hopi fructifero unda a discuti e importancia pa Aruba sigui cu su miembresia na RADO y pa sigui hasi test di doping cu e atletanan di nos pais.  A duna un splicacion amplio na Minister Schwengle riba e gastonan di e testnan y a sugeri pa minister considera aloca un fondo separa pa cada federacion por sigui haci testnan di doping.  
  Tambe a enfatisa cu ta hopi importante cu e miembro di Aruba den directiva di RADO keda haya sosten di minister y e departamentonan di deporte manera IBiSA pa asina e trabaonan riba tereno di Anti-Doping por continua.
  A reuni tambe cu e asina yama “Working Group Awareness Campaign” cu ta consisti di Sra. Sue-Ann Leon-de Leça di IBiSA, Srta. Angelique Koolman cu ta Presidente di e Comision Anti Doping di COA, Sr. Patrick Werleman, director Direccion Olimpismo di COA y alabes miembro di directiva di RADO. Mester bisa cu e miembronan di e “Working Group Awareness Campaign” a haya un presentacion di Sra. Chaderton unda a enfoca riba e conscientisacion di e hoben y tambe e educadornan di educacion fisico.  A repasa algun di e material y metodonan cu por wordo usa pa e meta importante aki.  Finalmente Sra. Chaderton a enfatisa cu e ta sumamente contento cu e joint venture cu tin entre IBiSA y COA pa yega na e grupo di trabao actual cu lo bay traha cu metanan comun riba anti-doping na Aruba.
  Den su ultimo reunion, Sra. Chaderton di RADO a reuni cu Srta. Angelique Koolman, cu ta e Doping Control Officer (DCO) principal na Aruba y alabes presidente Comision Anti-Doping di COA, Mario Wester, DCO,  Sr. Patrick Werleman, director Direccion Olimpismo di COA y alabes miembro di directiva di RADO.
  Aki a discuti e funcion di e Doping Control Officers na Aruba (DCO).  A yega na conclusion cu lo bay inicia un proceso di seleccion pa adkiri mas DCO's pa asina tin mas garantia y consistencia den e trabao importante di DCO's.  Tambe a papia di e plan di distribucion di testnan pa Aruba y aki Sra. Chaderton a duna algun bon sugerencia y conseho pa esaki bira mas eficiente y practico.
  A discuti tambe e deseo di e DCO'nan pa keda educa nan mes y e oportunidad cu nan ta haya pa mantene nan mes altanto y keda al dia cu nan licencia.
  Clausurando sra. Tessa a indica cu e la keda sumamente satisfecho cu e logronan di su bishita y tambe e la expresa su deseo pa mira Aruba sigui progresa riba tereno di e lucha contra dopahe.

img_8505.jpgimg_8508.jpg

 

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event