| 
Bubali Vitamalt den porta di clasificacion division di Honor PDF Print E-mail
Wednesday, 25 March 2015
bubali_vs_brazil_mrt_23.jpg Diasabra anochi e orguyo di Noord, SC Bubali Vitamalt, a logra un triunfo comodo riba Brazil Jrs cu anotacion di 5-0 cu practicamente ta pone e ekipo un pia caba den clasificacion pa e serie semi final di division di Honor.

  Mientras cu ya caba tanto RCA como Britannia a sigura nan clasificacion, e triunfo di Bubali ta practicamente clasifica e ekipo como e di tres candidato y ta keda un solo puesto cu ainda tin cu wordo decidi entre e ekiponan di Estrella. Deportivo Nacional/Washington, La Fama y Dakota.

  Desde temporada 2010 e ekipo di Bubali no a logra di clasifica pa e serie di play off division di Honor mas y awor a logra atrobe den un intento pa logra e di dos titulo di campeon di e popular club di futbol aki.

  E ultimo titulo ta data for di 1975, pues 40 aña pasa y awor e ekipo lo sigui lucha pa logra e di dos titulo di e organisacion aki.

  Apesar cu e triunfo tabata comodo tin cu bisa cu Bubali no a hunga su mihor wega y un biaha mas por a tuma nota di algun figura principal di e ekipo di Noord, entre nan e rumannan medio campista, Maurice y Daniel Escalona mientras cu portero regular, Juni Tromp mientras cu por a tuma nota di ausencia di Dolfito Jacobs y Ivan Mora.

  Sin embargo contra di un rival manera Brazil Jrs cu ta mustra di a confirma su mes caba cu regreso pa Prome Division, e ekipo di Bubali no tabata tin mucho dolor di cabes, anotando cuater gol den e prome tempo caba pa yega sosiego cu bentaha comodo di 4-0.

  E prome gol di e wega a wordo anota pa e centro delantero Tyrone Maria kende riba un pase di Antonio Tromp a logra di keda su so dilanti portero di Brazil pa logra e 1-0.

  E di dos gol a bay riba nomber di e refuerso nobo di Bubali pa e di dos buelta, esta Ricky Hodge kende cu potente tiro pafo di area penal, a logra marca e 2-0.

  E dominio di Bubali tabata completo den e periodo aki y tabata e defensa central Polo Ramirez Viveros, kende ya caba a faya un oportunidad cla un rato prome, a logra e 3-0.

  Brazil Jrs simplemente no tabata tin e forsa pa reacciona den e prome tempo aki y a purba cu balanan largo riba e centro delantero Deffery ‘CD’ Banton pero su so no tabata por.

  E di cuater gol di Bubali a bira un tiro di distancia bon coloca di Maikel ‘Panty’ Tromp, cu a basa over di cabes di e portero y cay den net.

  Den di dos tempo a bin un cambio formal ora cu Brazil Jrs a bira mas agresivo, a manda mas hungado den atake y a cuminsa presiona Bubali cu a perde concentracion total y segun minuutnan tabata pasando, a bira masha slordig mes.

  A presenta varios oportunidad pa Brazil anota y den forma inexplicabel na varios ocasion, su delanteronan tabata faya dilanto portero Angelo Croes di Bubali y hasta uno cu gol bashi y na escaso dos meter, CD Banton a pasa e bala over di gol.

  Bubali a perde concentracion, a bira hopi slow y tabata inefectivo den su wega di combinacion pero asina mes a sigui crea varios oportunidad di gol, entre nan tres pa Tyron Maria, otro dos mas pa Ricky Hodge y tambe Pi Leest kendenan a  presenta den area penal pero no a probecha mas.

  E ultimo gol di wega a bin riba un centro di Ricky Hodge cu a bin haya e hoben Edmar Tromp kende a pusha e bala den gol pa pone e score final na 5-0.

  E triunfo ta duna Bubali Vitamalt un total di 27 punto y e ekipo a solido na di tres lugar faltando ainda cinco wega pa hunga.

  E proximo compromiso di Bubali ta diabierna venidero contra di Riverplate mientras cu e ekipo di Estrella cual wega ta tuma lugar diasabra.

 

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event