| 
IBiSA hunto cu Fundacion Movemiento ta Bida ta organisa actividadnan PDF Print E-mail
Tuesday, 07 April 2015
5.jpg Rond mundo ta conmemora e fecha di 6 di april como e ‘Dia Mundial di Actividad Fisico’ y dia 7 di april como e “Dia Mundial di Salud”.

Instituto Biba Saludabel y Activo, IBiSA hunto cu Fundacion Movemiento ta Bida ta organisa un serie di actividad pa celebra e fechanan y pa conscientisa comunidad di Aruba riba e importancia cu movecion tin pa e salud humano.

  Durante un conferencia di prensa cu a tuma lugar na oficina principal di IBiSA, a duna un relato di e diferente actividad cu ta wordo organisa.

Directora di IBiSA sra. Monique van Embden, a elabora riba e tema principal cu e organisacionnan mundial ta enfoca ariba. Pa aña 2015 esaki ta “ Inactividad ta enfermedad, actividad fisico ta salud”.  Den su presentacion sra. van Embden a enfatisa cu e falta di actividad fisico ta un factor di risico importante pa haya malesanan cronico, manera cancer, diabetes y malesanan di curason y ader. A keda demostra cu e hecho di haci actividad fisico riba un base regular, ta wordo asocia cu un cantidad di beneficio fisico, social, economico y mental. Pa cual IBiSA como instituto cu ta promove un estilo di bida saludabel y activo ta un ehempel den organisa diferente actividad pa promove movecion y salud. Tin un serie di actividad prepara pa comunidad y publico den e proximo dianan, mientras cu IBiSA mes ta organisa un speurtocht specialmente pa su ‘stakeholders’ manera Departamento di Salubridad Publico, Wit Gele Kruis, SVB, AZV, HAVA, HOH y ImSan, di cual nan tin cu forma grupo di 5 persona pa participa. E speurtocht  pa ‘stakeholders’ ta tuma lugar dialuna dia 13 di april 2015.

  Pa Fundacion Movemiento ta Bida a hiba palabra su president, sr. Rudy Leysner cu na su turno a splica di e actividad cu ta bay tuma lugar riba Plaza Betico Croes diasabra dia 11 di april 2015. E dia aki ta bay concentra for di 6’or di atardi te cu 10’or di anochi den un actividad di “ARUBA BAN MOVE”, promoviendo asina e efectividad cu move 30 minuut pa dia tin. Durante e anochi lo tin demostracion y oportunidad pa publico participa completamente gratis na diferente deporte, entre otro aerobics, baile, arte marcial y mas.

Riba diahuebs, dia 16 di april 2015 comunidad di Aruba ta keda cordialmente invita pa asisti na un anochi di  informacion cu tin como topico “Biba Consciente”. Oradornan pa e anochi aki ta sra. Angelique Salsbach, dietista di Dr. Horacio Oduber Hospital, sr. Jerome van de Spil, fisioterapista y sra. Judelca Briceño, psicologo. Esaki ta tuma lugar den e sala multi-funcional di oficina principal di IBiSA situa na Frankrijkstraat 1,  for di 7:00 p.m. pa 8:30 p.m. Entrada y participacion na e anochi di informacion ta COMPLETAMENTE GRATIS.

  Diaranson dia 15 di april 2015 ta tuma lugar na IBiSA Sport Centrum San Nicolas un programa di “Be Fit”, cu ta cuminsa for di 4:00 p.m. y ta bay te cu 8:00 p.m. Esaki ta un programa specialmente pa publico participa na e diferente actividad di movecion. Tambe tin un caminata di 5K organisa pa e dia aki cu ta sali for di IBiSA Sport Centrum, direccion Macro Supermarket despues bay te na IPA y despues bolbe riba e mesun ruta pa finalisa na IBiSA Sport Centrum San Nicolas. Participacion na e caminata ta GRATIS y e prome 50 persona ta ricibi un T-Shirt regalo.

E programa cu ta tuma lugar na San Nicolas ta  prepara pa e studiantenan di IPA Graciela Brewster y Lisa Ras.

  Riba e mesun diaranson aki ta tuma lugar na Parke Jaburibari, un wega di ‘Ganzenbord’ bibo cu ta cuminsa for di 6:00 p.m. y ta bay te cu 8:00 p.m. E wega di ‘Ganzenbord’ ta bou di guia di Mark Ecury, Coordinador di Deporte Escolar di IBiSA y studiante di Movecion y Salud. Esnan cu ta desea di participa mester simplemente yega na Parke Jaburibari y aki forma bo grupo di 5 pa cuminsa hunga. Tur participante mester tey presente prome cu 6:00 p.m.  E wega di ‘Ganzenbord’ bibo ta wordo hunga cu ‘hende como pion’. Y e ta un wega apto pa tur edad pa cual IBiSA ta recomenda na henter famia pa participa.

  IBiSA y Fundacion Movemiento ta Bida ta haci un invitacion cordial na henter pueblo di Aruba pa participa na e actividadnan cu ta completamente gratis. Cu nos participacion, nos ta demostra mundo cu Aruba tambe a duna realse y importancia na e “Dia Mundial di Actividad Fisico” y cu Aruba ta riba e caminda corecto di haci actividad fisico. IBiSA ta para pa promove salud y actividad fisico pa hunto nos logra un Aruba saludabel. 

3.jpg2.jpg

 

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event