| 
7 April ta Dia Mundial Di Salud: Enfoke ta riba ‘Food Safety’ uzando e 5 yabinan PDF Print E-mail
Tuesday, 07 April 2015
unnamed.jpg Ta papia di ‘food safety’ ora por sigura cu e alimento lo no causa daño na esun cu ta bay come den forma di cuminda of likido.

‘Food safety’ ta nada otro cu siguridad di alimento. Tur hende tin e necesidad di alimento cu ta safe, liber di microbio, toxina of kimico. Pa motibo cu na Aruba nos cuminda pa un gran parti ta importa for di varios luga na mundo, cada paso den e cadena for di plantacion/produccion, procesamento, ora di warda, distribucion, preparacion te ora e cuminda ta riba nos tayo, ta importante.

Cuminda safe ta primordial pa tene nos hendenan saludabel, pa nos comunidad ta productivo y asina tene nos economia fuerte. Ta papia di cuminda cu no ta safe ora esaki no ta limpi prepara of ora cu e ta contamina. Cuminda cu no ta safe ta responsabel pa mas cu 200 tipo di malesa cuminsando for di diarea te na cancer, tambe malnutricion y tin biaha por conduci hasta na morto. Esunnan cu ta core riesgo ta specialmente muchanan chikito, hende mayor di edad y esunnan cu tin un enfermedad cronico.

Ta bon pa tene na cuenta e 5 yabinan di ‘food safety’ tanto pa esun cu ta produci, esun cu ta transporta, esun cu ta traha cu cuminda, pero tambe esun cu ta come e cuminda, esta e consumidor.

Yabi nr.1 Limpiesa na tur momento. Cuminsa cu laba bo man frecuentemente y corectamente prome y durante di preparacion di cuminda, despues di uza wc y mishi cu cabey, nanishi of boca.

Yabi nr.2 Separa alimento curu for di alimento cushina. Uza diferente ekipo y material pa cada tipo di alimento, p.e. no corta berdura riba e mesun tabla di corta despues di a corta galiña curu.

Yabi nr.3 Cushina tur alimento suficiente pa nan no keda curu. Esaki ta conta principalmente pa carni, galiña, webo y cuminda di lama.

Yabi nr.4 Mantene alimento na un temperatura adecuado. No laga cuminda cushina pafo di frigidair pa mas cu 2 ora. Cuminda friu mester wordo mantene bou di 7°C (frigidair) y mester ta bon tapa.

Yabi nr.5 Uza awa y alimento liber di peliger. No uza alimento machica, daña of contamina, tampoco uza producto cu su fecha a vence. Laba fruta y berdura bon specialmente si ta come nan curu.

Pa mas informacion por tuma contacto cu Hygienische Dienst na Departamento di Salud Publico tel. 522-4200. Tambe por subi y like nos facebook page: Departamento di Salud Publico Aruba.
 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event