| 
Colegio San Nicolas ta bay pa defende y retene su titulo di Campeon PDF Print E-mail
Thursday, 16 April 2015
colegio_san_nicolas.jpg Na aña 2013, nan ta e campeon di volleybal escolar di Enseñansa Avansa organisa pa IBiSA.

E team di mucha muher di Colegio San Nicolas a representa Aruba den ‘Weganan Interinsular’ na Boneiro y a titula campeon.

  Aña 2014 e hobennan di Colegio San Nicolas hunto cu nan coach Johnny Winterdaal ta ripiti e hazaña.  Prome durante e competencia escolar y despues durante e ‘Weganan Interinsular’, cu aña pasa a tuma lugar na Aruba mes pa e deporte di volleybal.

  Den e competencia escolar di 2015, e team di volleybal di Colegio San Nicolas mucha muher a keda invencibel y nan a titula campeon di Aruba pa di tres aña consecutivo.  Di e forma aki Colegio San Nicolas su team a haya e  pase  pa  bay  representa   Aruba   den  volleybal  di ‘Weganan Interinsular’ cu e aña aki ta tuma lugar na Corsou.

  Tur preparacion ta cla y e delegacion ta sali diabierna awor cu Insel Air den oranan di merdia.  Esnan cu ta forma parti di e delegacion di volleybal ta e hobennan: Julianne Dorothal, Charmaine Maria, Victoria Croes, Huijuan Weng, Janella Orman, Nakisha Winklaar, Leisha Curiel, Ghizlainy Dabian y Aurelia Nicolaas. Como coach pa e team ta biaha: Johnny Winterdaal y Iraida Dorothal. Coordinador di volleybal pa IBiSA ta sr. Edward Robles.

  Diabierna atardi tin e desfile y programa di apertura, mientras cu e prome wega di volleyball ta tuma lugar pa 2:30 p.m. entre St. Jozef V.S.B.O. di Corsou y Scholen Gemeenschap di Boneiro. E wega di Colegio San Nicolas Aruba ta programa pa 7:00 p.m. y ta cu International School of Curacao.

E weganan ta continua riba diasabra y ta cuminsa pa 10:00 a.m. entre Scholengemeenschap di Boneiro y Colegio San Nicolas Aruba, sigui pa e wega di 11:00 a.m. cu ta entre e schoolnan di Corsou. Merdia ta tuma un descanso y ta lunch den grupo pa despues sigui cu e weganan. International School of Curacao y Scholengemeenschap di Boneiro ta hunga pa 2:00 p.m. y e ultimo wega ta cuminsa pa 3:00 p.m. y ta entre St. Jozef V.S.B.O. di Corsou y Colegio San Nicolas Aruba. Di e forma aki e schedule di weganan di volleybal pa fin di siman venidero ta hinca den otro. E weganan di volleybal ta tuma lugar riba cancha Niels Liberia di Stadion Odulio Willems na Sufisant.  Despues di tur wega riba diasabra, tin e ceremonia di clausura y entregamento di premio na e ganadornan.

  IBiSA ta desea e team di Colegio San Nicolas forsa y hopi exito den nan weganan. Como instituto encarga cu Deporte Escolar na Aruba, IBiSA  tin tur confiansa cu e hobennan di Colegio San Nicolas ta bon prepara mentalmente y fisicamente pa enfrenta e reto cu nan tin fin di siman venidero. Y sigur nan ta subi cancha pa defende nan titulo di Campeon Interinsular di Volleybal y retene e titulo aki pa di  tres aña consecutivo pa Aruba y tambe pa nan school,  Colegio San Nicolas.

1.jpg2.jpg

 

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event