| 
Colegio San Nicolas a duna tremendo bataya pero Boneiro a bira Campeon den Volleyball PDF Print E-mail
Tuesday, 21 April 2015
campeon_scholen_gemeenschap_bonaire.jpg Den fin di siman a tuma lugar e “Weganan Interinsular” na Corsou y pa e deporte di volleybal tabata campeon di “Deporte Escolar” Aruba, esta Colegio San Nicolas cu a biaha pa defende nan titulo y mira si ta logra pa di 3 aña consecutivo titula campeon.

  E weganan a inicia ya for di Diabierna atardi, unda cu St. Jozef VSBO (Corsou 2) tabata e prome pa hunga contra di Scholen Gemeenschap Bonaire.  E wega entre nan dos a bay den dos set sigui cu a wordo gana pa e hobennan di Boneiro cu score di 25-8 y 25-21.

  E di dos wega Diabierna anochi tabata entre e team di Aruba, Colegio San Nicolas y e team di International School of Curacao (Corsou 1).  Den un wega sumamente interesante y sigur cu cada punto bon bataya te na final, a hunga tres set di cual e hobennan di International School Curacao a gana e prome set cu score di 26-24.  E hobennan di Aruba hunto cu nan coach meneer Johnny Winterdaal a lanta animo y a subi pa hunga e di dos set.  E reaccion a favorece e team di Colegio San Nicolas y nan a gana e di dos set cu score di 25-11.  Mesora a continua pa e set decisivo cu ta e ultimo set.  E hobennan di Corsou tabata busca cada punto pero Aruba cu no a keda atras y a sigui te logra gana e di tres set tambe cu score di 16-14 y a gana e wega asina.

  Diasabra mainta Volleybal a continua y den e prome wega e hobennan di Aruba a subi cancha pa hunga contra Scholen Gemeenschap Bonaire.  Den un wega hopi rapido, e hobennan di Boneiro a sorprende e team di Colegio San Nicolas totalmente y nan no a logra reacciona na tempo, asina Aruba a perde su prome wega y Boneiro a gana tur dos set cu scorenan di 25-16 y 25 -16.

  Prome cu lunch a hunga e wega di International School of Curacao y St. Jozef VSBO, ambos team di Corsou.  Hopi comodo e hobennan di International School of Curacao a pasa riba esnan di St. Jozef VSBO pa gana tur dos set sigui cu score 25-11 y 25-16.

  Despues di merdia a sigui e wega di Scholen Gemeenschap Bonaire contra di International School of Curacao.  Esaki ta otro wega cu a bay tres set completo y cada set tabata fuertemente bataya.  International School of Curacao a logra domina y a gana e prome set cu score di 25-20.  Di biaha den e di dos set, Scholen Gemeenschap Bonaire a reacciona y demostra cu nan no ta laga e wega bay facil y a sorprende e team di Corsou pa gana e di dos set 25-9.  For di inicio di e di tres set, ambos team a bringa hugada di cada punto.

  Tabata cla cu e competencia di Volleyball e aña aki den “Weganan Interinsular” a resulta hopi pareu entre e schoolnan, y hungando e wega aki ainda, no tabata tin un claridad definitivo cua ta e school cu ta bira campeon; pa completa e wega aki, International School of Curacao a logra gana e di tres set cu score di 15-13.

  E ultimo wega di Diasabra tabata entre Colegio San Nicolas Aruba y e team di Corsou St. Jozef VSBO.  Basta facil y rapido, e hobennan di Aruba a logra anota su puntonan riba e team di Corsou y a gana den dos set sigui cu score di 25-14 y 25-19.

  Na final di tur wega e resultado a keda empata entre e teamnan di Aruba, Scholen Gemeenschap Bonaire y Corsou 1, International School of Curacao.  Tur tres tabata tin 2 wega gana y 1 wega perdi.  Na momento cu esaki a resulta asina, organisador encarga cu ta Fundashon Desaroyo Deportivo Korsou (FDDK) a pasa pa wak e setnan na fabor di e teamnan.

  Den esaki e team di Colegio San Nicolas di Aruba a resulta cu 4 set gana, mientras cu Scholen Gemeenschap Bonaire como tambe International School of Curacao tabata tin 5 set gana, pues e dosnan aki a bolbe keda empata.

  Pa e team di Aruba a keda conclui cu nan ta finalisa e competencia na di tres lugar e aña aki y e hobennan a ricibi nan respectivo medaya y trofeo.

  Entre e team di Scholen Gemeenschap Bonaire y International School of Curacao a pasa pa mira e cantidad di set perdi pa cada school. Aki a keda defini cu Corsou tabata tin 3 set perdi, mientras cu Boneiro tabata tin 2.  Finalmente International School of Curacao a keda na di dos lugar y campeon di volleybal 2015 pa “Weganan Interinsular” a bira Scholen Gemeenschap Bonaire.  E trofeo di hungador mas valioso den volleybal a bay pa e hoben di Boneiro Tirza Richards.

  IBiSA ta orguyoso di e prestacion di Aruba su team campeon di volleybal escolar cu ta Colegio San Nicolas y ta felicita nan cu e logro di tercer lugar.  E weganan tur tabata hopi fuerte y bon bataya y ta visibel den e forma cu mester a conclui e titulo di campeon cu e no tabata facil.  E invitacion sigur ta keda na tur school pa sigui practica mas deporte na school y participa na e competencianan di “Deporte Escolar” cu IBiSA ta organisa di tal forma cu bo school por haya un oportunidad tambe pa representa Aruba den “Weganan Interinsular” proximo aña.

1.jpg2do_lugar_international_school_of_curacao.jpg3er_lugar_colegio_san_nicolas.jpg

 

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event