| 
International School of Aruba a titula Campeon den Futbol mucha muher na Corsou PDF Print E-mail
Tuesday, 21 April 2015
campeon_futbol_international_school_of_aruba.jpg Un schema di entrenamento y preparacion coordina pa IBiSA, hunto cu meneer Lee y meneer Samingoen di International School of Aruba cu a cuminsa den luna di Januari a duna bon resultado.

E satisfaccion y alegria tabata inmenso ora cu den fin di siman e hobennan di e team di futbol di International School of Aruba a titula campeon na Corsou den “Weganan Interinsular”.

  Como preparacion na Aruba, e team a hunga varios wega di fogeo cu a yuda y stimula nan mentalidad competitivo, a la ves a traha riba nan habilidad, tactica y dominio di bala riba tereno.  Den tur forma a traha duro cu e team completo y ainda un dia prome cu nan a biaha a hunga e ultimo wega di fogeo.  E team tabata hopi bon prepara pa nan weganan na Corsou.

  Riba Diabierna atardi, International School of Aruba a hunga su prome wega contra di Kolegio Mgr. Wim Ellis, cu tabata e Team 1 di Corsou, e duracion di wega tabata 25 minuut pa banda, cu  un descanso di 10 minuut.  E hobennan di International School of Aruba a subi tereno decidido y cu animo tabata move sigur direccion di gol.

  E hobennan di Aruba a sa di sorprende e team campeon di Corsou y e wega a finalisa cu anotacion di 6 pa 0.  Pa International School of Aruba a anota 4 gol Enzi Broussard, mientras cu su ruman Yori Broussard a anota 2 gol.

  E weganan a continua Diasabra y Aruba a habri e dia enfrentando e team di Boneiro cu a wordo representa pa e hobennan di Kolegio Kristo Bon Wardador.

  Un bon anochi di descanso y soño a duna e hobennan di International School of Aruba energia barbaro pa domina e wega completamente.  E team di Boneiro no tabata tin oportunidad practicamente pa desaroya riba tereno y Aruba si a probecha di cada ocasion.  E wega aki ta finalisa cu anotacion di 9 pa 0 na fabor di Aruba, cu 5 gol anota pa Enzi Broussard, 2 gol anota pa Dominique Lopez, mientras cu Yori Broussard y Angelina Bardi a anota 1 gol cada un.

  International School of Aruba su ultimo wega a tuma lugar Diasabra atardi pa 3”or y a topa cu Team 2 di Corsou cu tabata Kolegio Don Sarto.  Animo y moral di nos hobennan di Aruba tabata halto y a hunga e ultimo wega aki cu hopi siguridad. Cu un dominio total riba tereno di bala cu a kita tur duda, si ainda tabata tin.  E hobennan di International School of Aruba a gana e wega cu anotacion di 8 pa 0. Enzi Broussard a marca 6 gol mas riba su nomber, mientras cu Dominique Lopez a anota 1 gol y Yori Broussard tambe a anota 1 gol.

  E resultado final di e “Weganan Interinsular” escolar den futbol pa mucha muher  a bira:

Kolegio Don Sarto (Corsou 2) na di tres lugar y Mgr. Wim Ellis (Corsou 1) a keda na di dos lugar.  Ambos team a ricibi nan medaya y trofeo, contento cu e logro pa nan school y pa Corsou.

  International School of Aruba a gana tur wega na Corsou y a finalisa invicto, titulando asina CAMPEON di Futbol mucha muher di e “Weganan Interinsular 2015”, cu 23 gol na fabor y 0 gol contra.  Tur hoben a ricibi nan medaya y e school ta ricibi e trofeo di campeon.  Como hungador mas valioso di e weganan di futbol a keda e hoben Yori Broussard di International School of Aruba cu tambe a ricibi su trofeo di MVP.

  IBiSA ta felicita e team completo di International School of Aruba, como tambe entrenador di e school meneer Stephen Lee y chaperonne di e hobennan sra. Elena Musto, cu logro di e titulo di campeon.  Un gradicimento special na e mayornan cu tambe a biaha cu e hobennan pa Corsou pa duna nan e apoyo necesario durante tur wega cu sigur tabata un estimulo y animo grandi.

  Na yegada di e delegacion di Aruba Diadomingo anochi, e team di International School of Aruba a wordo ricibi den e sala VIP di Aeropuerto Internacional Reina Beatrix pa representantenan di Gobierno, Minister drs. Paul Croes cu tabata presente pa felicita e team y duna nan bonbini den nomber di Minister di Deporte dr. Alex Schwengle.  Minister Michelle Hooyboer Winklaar tambe tabata presente y Directora di IBiSA Sra. Monique van Embden.  Presidente di Parlamento Sra. Marisol Lopez Tromp a haci e biahe cu e team como un mayor y tambe tabata hunto den e sala cu su coleganan.  Alegria y positivismo tabata reina, pa motibo cu na mes momento tambe a yega e delegacion di landamento cu a bay representa Aruba na Carifta y tambe a logra hopi medaya.  IBiSA ta felicita tur atleta cu a duna un tremendo prestacion den exterior y a trece medaya y trofeo den nan deporte pa Aruba y ta aprecia e gesto y honor cu e mandatarionan a duna na tur atleta.

2do_lugar_kolegio_mgr._wim_ellis.jpg3er_lugar_kolegio_don_sarto.jpgdsc01833.jpgdsc01845.jpgdsc01847.jpg

 

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event