Diferencia di tempo y diferencia di temperatura ta loke Sarah-Quita a confronta durante un periodo di 7 siman leu for di cas.

  Ela bishita shete pais desde Maui pa Korea.  Trabao na cantidad cu diferente meta. Na Maui e tin cu cumpli cu e fotoshoot pa su sponsor di bela esta NeilPryde y di su tabla Starboard pa promocion di nan producto di 2016.  Siguientemente e competencia na Korea unda ela claba su promer victoria di e temporada di competencia di PWA den e disciplina di slalom.

  Fuera di competi Sarah-Quita ta embahadora di bon boluntad pa duna eventonan un toke special cu su presencia esaki tabata e caso na Gruissan, Francia durante e famoso Défiwind Challenge.  E evento tabata un reto fisico pa e 1200 regatista cu a registra pa windsurf den biento cu ta midi entre 40 pa 60 nudo na momento cu e biento “la Tramontana” cuminsa supla.  Durante 4 dia Sarah-Quita a participa den biento cu forsa di horcan y a focus unicamente pa cubri e distancia di 40 kilometer cu un velocidad di 30 Km pa ora y sali di laman ileso.  Banda di esey e ta traha ariba un proyecto cu dos fotografo profesional den cual e ta figura como protagonista unda ta capta e bida di un regatista cu ta windsurf rond mundo ta busca lugarnan excepcional pa windsurf.  Un di su buskedanan ta hibe na Islandia unda e ta pasa hopi frieu, ta windsurf den condicionan artico cu scenarionan di naturalesa manera fjord, seronan di ijs, awa thermal, laguna, y riu cu ijs, cascada di awa y montaña cubri cu sneu cu ta forma e cuadro di e pelicula Cabei Busha.

  Pa no perde strea di Noord, Sarah-Quita ta di regreso e dianan aki na Aruba pa relaha, practica y prepara mentalmente pa su siguiente reto cu e biaha aki ta e competencia na Islas Canarias unda e ta participa den e disciplinanan “Ola” na Gran Canaria y Tenerife y tambe “freestyle” na Fuerteventura.