E dianan 11  pa 20 di juli, un delegacion den e deporte di biyar lo sali pa Buenos Aires, Argentina unda e Panamericano di biyar 2015 lo tuma luga. 

Esaki lo bira e di 17 edicion di e Panamericano di biyar. Pa loke ta Aruba su representantenan nos tin cu bisa cu un total 4 atleta di taya lo competi pa e titulo maximo Panamericano kendenan ta Gunnar Leonardo, Campeon ABC 2015, Richard Wolff, Campeon Nacional 8 y 9 ball, Ditto Acosta Campeon Nacional 10 ball y Ryan Rampersaud.

Notabel ta cu esaki ta di dos aña sigui cu tur e disciplina nan lo wordo hunga esta 8 ball, 9 ball, 10 ball, fuera di esey lo tin un Grand Prix extra. Esaki ta nifica cu ta ocho pa dies ora pa dia di biyar sin stop, algo cu sigur cada hungado mester ta mentalmente hopi bon prepara pe. E prome 4 hungadonan di cada disciplina menciona lo clasifica pa e Mundial di biyar na 2016.

Actualmente tin alrededor di 300 hungado participando den e circuito Panamericano di cual e hungadonan di Aruba ta rank #25 Gunnar Leonardo, #27 Ditto Acosta, #32 Richard Wolff y #58 Ryan Rampersaud. Mas cu claro e intencion di nos hungadonan ta pa seya e clasificacion pa e Mundial di biyar otro aña y pone Aruba entre e top 15 di e miho hungadonan Panamericano.  Den pasado e hungadonan Ditto Acosta y Aaron Franken a sa conkista e titulo como campeon Panamericano, Ditto Acosta e logra esaki den bola 9 y Aaron Franken den bola 8.

Mester bisa cu tur wega nan lo concentra den e El Trebol Moreno cu ta keda 1 ora leu di Buenos Aires, mientras e acomodacion mes ta super bunita cu 30 mesa di biyar aden.

 Un danki sigur na Lotto, e Loteria di Aruba pa medio di Comision di Subsidio cu lo subsidia e biahe di nos delegacion di biyar pa e campeonato Panamericano di biyar na Argentina.

Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio