| on Tuesday, 30 June 2009
|
Published in : , Softball |
ORANJESTAD -- Diadomingo, 28 di juni 2009 despues di cuater diadomingo cu partidonan di softball jen di emocion brinda door di diferente equiponan di nos federacion, a continua riba e tereno di Aruba Juniors na Socotoro Oranjestad bow di auspicio di “Federacion Liga Mayor di Softball Arubano” e di cinco campeonato pa cu Liga Mayor anja 2009.
Pa mas o menos 09’or y 45 minuut di mainta e cuerpo di umpire bow di guia di Sixto Vrolijk, chief-umpire Joy Bergen a duna inicio na e promer encuentro cu a bay entre e equipo Sbt Aruba Juniors LG y e jovennan di Sbt Budlight Braves. Tawata un partido durante e promer dos entrada ambos equipo no a permiti otro pa anota careda, pero Budlight Braves den bom di inning no. 2 ta anota nan promer 2 careda poniendo e score 2 pa 0 na nan favor. Ambos equipo no ta permiti otro pa anota careda den e inningnan 3 cu 4. Atrobe ta Sbt Budlight Braves ta rally pa 4 careda den bom di inning no. 5 pa pa pone e score 6 pa 0 na nan favor. Aruba Juniors ta wordu silencia atrobe den cabez di inning no. 6 y cu e score di 6 pa 0 Budlight Braves ta triunfa riba e equipo di Sbt Aruba Juniors. Budlight Braves ta termina cu 6 careda anota, ta bati un total di 7 hit y a comete 1 error riba tereno, mientras cu Aruba Juniors ta sufri nan promer derota derota den campeonato 2009 y no ta score careda, batiendo solamente 5 hit y a comete un total di 3 error. E mihor bateadornan pa Budlight Braves a resulta den nomber di Aubrey Maduro cu 2 hit den 3 turno, mientras cu Eric Lake y Julio Croes a bai cu 1 hit den 2 turno. Pa Aruba Juniors e mihor bateador tabata den persona di Nelson Kock cu 2 hit den 3 turno. Pitcher ganador a resulta Wilbert Maduro pa Budlight Braves, mientras Mila Martinus a sufri e derota pa su equipo di Aruba Juniors hanjando relevo di Juancho Tromp.
E di dos encuentro riba e schedule a bai entre e equiponan “SBT Surprise Balashi” como e equipo di cas y enfrentando “SBT La Moderna Sluggers” e bishitantenan. Aki ambos equipo a subi tereno pa duna e publico presente un bon partido na unda ambos equipo te na e momento ey tabatin 3 wega gana sin ningun derota. Tawata La Moderna Sluggers den cabez di inning no. 1 ta anota 2 careda pero Surprise Balashi ta corta ventaja den bom di mesun inning pa pone e score 2 pa 1. Sbt La Moderna Sluggers ta amplia esaki cu 2 careda mas den cabez di inning 2 poniendo e score 4 pa 1 na nan favor. Den bom di inning no. 3 Surprise Balashi ta bolto e score anotando nada mas cu 5 careda, poniendo e score 6 pa 4 na nan favor. Den cabez di inning no. 4 La Moderna sluggers ta bolbe corta ventaja anotando 1 careda caminda e score ta bira 6 pa 5 na favor di Surprise Balahsi. Surprise Balashi den bom di mesun inning ta Pili 1 careda mas pa pone e score 7 pa 5 na nan favor. La Moderna Sluggers ta bolbe corta ventaja den cabez di inning no. 5 cu tremendo tablazo di cuater skina di Johan Richardson poniendo e score 7 pa 6 na favor di Surprise Balashi. Den cabez di inning no. 6 La Moderna Sluggers ta menaza caminda nan ta yena base, pero cu un tremendo atrapada di tercera base Mirto Kock ta caba cu e speranza di La Moderna Sluggers. Cu e score aki di 7 pa 6 e partido ta termina pa tempo reglamentario cu un victoria di Surprise Balashi riba La Moderan Sluggers. Surprise Balashi ta logra nan di cuater truinfo den campeonato 2009 cu 7 careda, batiendo 7 hit cu 2 error cometi. La Moderna Sluggers ta sufri nan di prome derota den e campeonato 2009 cu 6 careda, a bati 9 hit pero a comete 4 error. Mihor bateadornan pa Surprise Balashi tawata den persona di Wilbert Maduro di mil punto cuy 2 hit den 2 turno, mientras cu Ramiro Geerman y Pedro Albertsz cu 2 hit den 3 turno. Hubert Webb tambe a bati 1 hit den 2 turno. Pa La Moderna Sluggers Johnny Thiel y Harold Rafine a bay di mil punto cu 2 hit den 2 turno y 1 hit den 1 turno respectivamente. Ronny Donata tambe tabatin un bon dia cu 2 hit den 3 turno, mientras cu Roberto Croes cu 1 hit den 2 turno. Johan richardson tabatin un homerun pa e equipo di La Moderna Sluggers. Pitcher ganador pa e equipo di Surprise Balashi tawata Jose Vrolijk, mientras cu Claudio Quant tabata e pitcher perdedor pa e equipo di La Moderna Sluggers.
Despues di esaki a sigui cu e di tres encuentro di dia entre e dos equiponan di “SBT San Nicolas Movers” y “SBT Kenro Jewelers”, caminda ambos equipo a subi tereno pa duna lo mihor cu tin. Tawata e equipo di Kenro Jewelers den cabez di inning no. 1 ta anota 2 careda y ta amplia e score aki cu 1 careda mas den cabez di inning no. 2. San Nicolas Movers ta piki un careda den bom di inning no. 1. Den cabez di inning no. 3 Kenro Jewelers ta bolbe score 3 careda poniendo e score 6 pa 1 na nan favor. Pero San Nicolas Movers tampoco ta keda tras y den bom di inning no. 6 ta bolbe score 3 careda poniendo e score 6 pa 4 na favor di Kenro Jewelers. Den cabez di inning no. 7 Kenro Jewelers ta score 1 careda poniendo e score 7 pa 4 na nan favor. Cu e score aki tambe e partido ta termina después di 7 inning completo cu un victoria di Kenro Jewelers riba San Nicolas Movers. Kenro Jewelers tabatin 7 careda anota, cu 11 hit bati y a pifia na 2 ocasion riba tereno. San Nicolas Movers di nan banda tabatin 4 careda, ta bati 8 hit mientras nan ta comete 4 error. Pitcher ganador tawata George Pontilius pa Kenro Jewelers, mientras cu Oswaldo Cuba ta sufri e derota pa San Nicolas Movers. Mihor bateador pa Kenro Jewelers tawata den persona di Toni Warner y Rudi Carti cu 2 hit den 4 turno. Pa San Nicolas Movers tawata Sydney Elisabeth ci mil punto cu 2 hit den 2 turno, mientras cu Ferdinand Flanders a bay di 2 hit den 3 turno.
E di cuater partido di dia a bai entre e dos equiponan “SBT Valero Boomerang” y “SBT Central Clippers”. Ambos equipo a subi tereno pa brinda e publico presente un tremendo partido. Durante e promer tres entradanan ningun di dos equiponan kier a baha cabez pa otro y no a permiti otro pa anota ningun careda. Tawata den cabez di inning no. 4 caminda Valero Boomerang ta piki 2 careda y ta pone e score 2 pa 0 na nan favor. Den bom di inning no. 5 Central Clippers ta anota nan promer careda pa corta ventaja y e score ta bira 2 pa 1 na favor di Valero Boomerang. Despues den cabez di inning no. 6 Valero Boomerang ta amplia e score cu 5 careda mas poniendo e score comodamente 7 pa 1 na nan favor. Central Clippers ta piki 2 careda mas den bom di inning no. 6, caminda e score ta bira 7 pa 3 na favor di Valero Boomerang. Cu e score aki tambe e partido ta termina pa motibo reglamentario cu un victoria fasil pa Valero Boomerang riba
Central Clippers. Valero Boomerang ta logra un victoria importante den campeonato 2009 caminda nan ta score 7 careda, nan a bati un total di 9 hit y a pifia na 4 ocasion riba tereno. Mientras cu Central Clippers tabatin 3 careda anota, a bati un total di 6 hit y a pifia 5 biaha riba tereno. Mihor bateador pa Valero Boomerang tabata den persona di Mario Maduro di mil punto cu 2 hit den 2 turno, mientras cu Frances Williams y Francisco Albertsz tur dos cu 2 hit den 3 turno. Pa Central Clippers tawata R. Wester cu R. Odor a bati 1 hit den 2 turno. Pitcher ganador tabata den persona di Francisco “Sieg” Albertsz pa Valero Boomerang, mientras cu Benny Geerman a bai cas cu e derota pa su equipo di Central Clippers.
E ultimo partido segun e programacion di dia a bay entre “SBT Starcon Racketeers” enfrentando “SBT Kibaima A.I.S.”. Ambos equipo a subi tereno pa brinda e publico presente un bunita partido. Ya den cabez di inning no. 1 Starcon Racketeers ta score e 1 careda di e partido pa pone e score 1 pa 0 na nan favor. Starcon Racketeers ta amplia e score aki cu 4 careda mas den cabez di inning no. 2 poniendo e score di 5 pa 0. Un vez mas den cabez di inning no. 4 Starcon Racketeers ta anota 1 careda, poniendo e score 6 pa 0 na nan favor. Kibaima A.I.S. den bom di inning no. 4 ta anota 2 careda pa pone e score 6 pa 2 na favor di Starcon Racketeers. Den bom di inning no. 6 Kibaima A.I.S. ta corta ventaja cu un careda mas poniendo e score 6 pa 3. Den cabez di inning no. 7 ta Starcon Racketeers ta reacciona anotando 2 careda pa aleja un tiki di Kibaima A.I.S. Starcon Racketeers ta hala faja mara y cu e score 8 pa 3 tambe e partido ta finalisa cu un victoria riba Kibaima A.I.S. Mihor bateadornan pa Starcon Racketeers tawata den persona di Abraham Cornelio y Robert Haynes cu 2 hit den 4 turno. Pa Kibaima A.I.S. e mihor bateador tabata Benjamín Dijkhoff di mil punto cu 1 hit den 1 turno, mientras Franklin Fingal a bati 2 hit den 3 turno. Pitcher ganador tawata den persona di G. Geerman pa Starcon Racketeers, mientras cu Edgard Falconi a carga e derota pa su equipo di Kibaima A.I.S.
Cu esaki tambe Federacion Liga Mayor di Softball Arubano por mira atras riba otro bunita diadomingo cu tremendo partidonan den campeonato 2009, cu yen di sorpresa. Mirando e resultadonan aki no por papia nada ainda ken si y ken no ta den e partdonan di semi-final. Durante e diadomingo aki tawatin un tremendo ambiente di softbal y na unda ya menciona tremendo weganan di softball a wordu brinda. Directiva di SBT Astros Budweiser tawatin e bar cu productonan di Playa Liquor encabeza cu Budweiser cu tawata na agrado di tur presente. Tawatin un cushina na unda tur presente por a saboria di cumindanan na nan estilo di Astros Budweiser. Musica tawata na encargo di DJ Victor Figuereo cu a sa di deleita tur e presentenan cu su tremendo musicanan cu a cay sigur na agrado di tur presente.
For di akinan directiva di Federacion Liga Mayor di Softball Arubano pa medio di esaki kier a gradici tur esnan cu a contribui na di cinco diadomingo di nos campeonato 2009. Un palabra di pabien na Sr. Yubi Toppenberg y Carlos Javois na kendenan e campeonato ta wordu dedica. Un tremendo trabow riba tereno door di cuerpo di umpire bow di direccion di Sixto Vrolijk. Na nos scorer di diadomingo Sra. Jamila Dirksz un danki grandi pa bo pasenshi y bo contribucion. Na nos fanaticonan cu a acudi na masa grandi, danki pa boso presencia.
Tambe pa medio e comunicado aki directiva di Federacion Liga Mayor di Softball Arubano ta participa cu diadomingo awor 5 di juli 2009 lo ta e ultimo diadomingo di nos campeonato regular. Ta riba e fecha aki tur cos lo duna claridad riba e desarollonan di nos partidonan semi-final y final.
|
|
|
| Users' Comments |
|
Average user rating
 (0 vote)
|
|
Add your comment
|
 (Custom).JPG)
