SportsAruba.com - Aruba Sports News Provider - Dos medaya pa Aruba durante prome dia di CCCAN

Dos medaya pa Aruba durante prome dia di CCCAN

on Wednesday, 01 July 2009

ORANJESTAD -- Diamars, e prome dia di competencia di e Campeonato Centro Americano y del Caribe di Natacion (CCCAN), a termina cu un resultado sumamente positivo pa Aruba. Ashley Groters a gana e medaya di plata den e 200 meter Breaststroke, mientras cu Jordy Groters a sa di gana e medaya di brons
den e 200 meter Breaststroke. Ademas di esaki un total di 7 landador di Aruba a sa di clasifica pa e finalnan di e campeonato durante e prome dia caba. Marellys Robles de Medina a termina na di 8 lugar den e 200 meter Butterfly, Sue-Gin Arends a termina na di 8 lugar den 50 meter Backstroke, Ally Ponson a termina na di 7 lugar den 50 meter Backstroke, Jemal Le Grand a termina na di 6 lugar den e 50 meter Backstroke, Daniella van den Berg na di 6 lugar den e 200 meter Breaststroke, Jordy Groters na di 3 lugar den e 200 meter Breaststroke y Ashley Groters na di 3 lugar den e 200 meter Breaststroke.
E campeonato CCCAN ta un campeonato hubenil cu e aña aki ta tumando lugar na Barquisimeto, Venezuela, cu participacion di varios pais centro americano y islananan di caribe. E competencianan a cuminsa riba diamars y lo continua te cu diadomingo.
Un factor cu sigur ta afecta e landadornan ta e temperatura durante oranan di atardi y anochi. E awa di e piscina ta mas frieuw cu loke nos atletanan ta custumbra cu ne y ta hasi cu nan musculonan ta “fria” hopi lihe durante nan actividad. Por constata cu no a logra mehora temponan personal, ni tampoco recordnan nacional of di campeonato. En general sinembargo e delegacion Arubano ta satisfecho cu e resultadonan logra durante e prome dia di competencia. Ta sperando varios medaya mas pa nos pais durante e dianan cu falta di e Campeonato CCCAN.

Users' Comments

Average user rating

(0 vote)