SportsAruba.com - Aruba Sports News Provider - CUBA TA BIRA SEDE DI E PROXIMO CAMPEONATO DI ISLANAN DI CARIBE

CUBA TA BIRA SEDE DI E PROXIMO CAMPEONATO DI ISLANAN DI CARIBE

on Wednesday, 01 July 2009

Published in : , Noticia

ORANJESTAD -- E isla Cuba ta bira sede di e “Caribbean Islands Swimming Championships” (CISC) na aña 2010, un derecho cu Aruba a aspira di por a logra pa nos pais. Durante e Congreso Extraordinario di e Confederacion Centro Americana y del Caribe de Aficionados a la Natacion (CCCAN), e ausencia di mayoria isla di Caribe,
cu en realidad ta esnan cu ta participa na e Campeonato CISC a resulta favorable pa Cuba. Cu un votacion di 7 pais pro Cuba y 5 pais pro Aruba, e decision final tabata cu Cuba lo organisa e proximo CISC. Normalmente alrededor di 20 pais ta participa, pero e biaha aki varios factor a hasi cu e cantidad di pais participante ta menos, loke por a nota tambe durante e congreso.
Arubaanse Zwembond a traha duro pa prepara su mes pa por a carga e responsabilidad pa organisa CISC 2010. Despues di a organiza exitosamente e campeonato Dutch Caribbean na 2007, y e campeonato CARIFTA dos aña consecutivo (2008 y 2009), Aruba a ofrece di asumi e responsabilidad di organiza e campeonato CISC den e disciplinanan di landamento y landamento sincroniza. E edicion di 2010 tabata tin un aspecto special pa AZB, mirando cu lo tabata exactamente dies aña despues di cu Aruba tabata sede di un campeonato CISC sumamente exitoso na aña 2000.Apesar di un presentacion durante e congreso cu a ricibi reaccionnan sumamente positivo, e “compromiso” di algun pais cu Cuba tabata e factor cu a hasi e diferencia.
Pa Cuba e organizacion di e campeonato CISC sigur ta importante, mirando cu na aña 1997 tabata e ultimo biaha cu e isla a organiza un campeonato regional. Cu e medayista Olimpico, Rodolfo Falcon awor na cabez di e Federacion, Cuba ta aspira pa participa mas frecuente na campeonatonan internacional, pero tambe pa ta sede di mas evento acuatico. E prome compromiso cu nan a logra ta pa ricibi representantenan hubenil di e islanan di Cariba na aña 2010.

Users' Comments

Average user rating

(0 vote)