| on Wednesday, 22 July 2009
|
Published in : , Basketball |
ORANJESTAD -- Un biaha mas un entrenador deportivo di nos país ta cla pa biaha pa exterior pa participa na un curso tecnico, organisa como parti di e programa di capacitacion di e Organización Deportiva Panamericana (ODEPA). E biaha aki ta toca turno na e deporte di basketball,
cu lo reuni na Mexico tur entrenador e paisnan di nos continente e luna aki. Comite Olimpico Arubano a ricibi e invitacion di parti di ODEPA y a acerca e Federación Arubano di Basketball, ABB, y su presidente Carmen Loefstok, cu e peticion pa propone un candidato pa e curso. E federación na su turno a propone e entrenador di basketball, Orlando Rasmijn.
Manera ta conoci, algun aña pasa ODEPA a inicia un programa di cursonan tecnico di deporte, enfocando principalmente riba un mehoracion di e nivel di e entrenadornan deportivo den e diferente paisnan di nos continente. Alrededor di 700 curso a wordo organisa, tanto cursonan regional, como continental, y cu hopi éxito y resultadonan favorable. Comité Olímpico Arubano y su Federacionnan miembro a sa di hasi bon uso di e oportunidad valioso aki y diferente entrenador Arubano a biaha pa exterior pa ricibi información relevante pa nan trabou. Después di un intermedio, pa motibo di un evaluación profundo, ODEPA a re-anuda e programa di cursonan atrobe, a petición tambe di e propio Comitenan Olímpico Naciona cu sigur tabata mira e gran valor di e cursonan.
Manera ta e caso cu tur e cursonan di ODEPA, después di su regreso for di Mexico, Orlando Rasmijn mester comparti e conocimentonan adquiri cu tur su coleganan den e deporte di basketball, pa asina mas tanto hende posibel den e deporte aki por beneficia di e curso. Den esaki e lo ricibi apoyo logístico y organizatorio di e Director di Desaroyo di COA, sr. Roy van Putten.
COA ta felicita Aruba Basketball Bond y muy en particular sr. Orlando Rasmijn, confiando cu e participación aki na e curso continental di basketball lo tin su bentaha pa e deporte di basketball den su totalidad na Aruba.
Riba e portret por mira e momento cu entrenador Rasmijn ta firma e contrato, pa medio di cua e ta compromete su mes cu COA pa comparti su conocimento cu otro entrenadornan na Aruba.
|
|
|
| Users' Comments |
|
Average user rating
 (0 vote)
|
|
Add your comment
|
