SportsAruba.com - Aruba Sports News Provider - ENTREGA DI PREMIOS COORSLIGHT BLACKBALL 2009!!

ENTREGA DI PREMIOS COORSLIGHT BLACKBALL 2009!!

on Saturday, 07 November 2009

Published in : , Billiard

EntregamentoPremiosCoorsLight2009 (Custom).jpg

STA CRUZ -- Diaranzon anochi ultimo tabata tin e apertura inoficial di CLASSIC BILLIARDS na Pos Abou, caminda tabata tin entregamento di premios di e prestigioso torneo COORSLIGHT BLACKBALL TOUR 2009. Acto di presencia a wordo duna door di nada menos cu 3 flamante
“chicas coors”
cu a pone casi tur billarista presente nan “bista” bay off!! Dokter di wowo lo ta bay ta basta druk den dianan benidero pa drecha punteria di tirado nan ya cu diahuebs anochi tabata tin apertura y comienso di e grandioso torneo annual internacional “King Of The Caribbean”, e biaha aki pa prome biaha na Aruba cu team nan di Corsow, Bonaire, Aruba, y Trinidad. Mas di esaki den otro edicion.
Ban back na e “chicas Cooooors ….”. Cu man nan ta tembla di nervio dilanti tanto “creaciones divina” Carlos Gomez di e conosido team BAD DOGS a tuma e copa y e famoso “envelop” pa nan logro di a clasifica pa playoff. Igualmente Robby Nathu di TEAM CUERVO tabata un rato “sprakeloos” ora cu e tambe a risibi e premio pa a clasifica den playoff. Ambos team a keda elemina den playoff y ta comparti e di 5 luga.
Na di 4 lugar a keda J&J JAWS, e team cu a “break through” den apenas 3 anja di existencia. Un “Gorilla” visiblemente exita, Eddie Flanegin, a pusha un y tur un banda pa por a haya e honor di tuma e premio serca e “chica Coors”. Na di 3 lugar a keda e conosido batayon di pariba di brug, CLASSIC-JOHNSON, kendenan a bataya fuertemente cu J&J Jaws p’e puesto ey y “nip-nip” a logra surpasa J&J cu score di 5-4! Ronald “Tico” Geerman a risibi premio di parti di Classic-Johnsons.
Na di 2 lugar a keda e campeon 2008, HUT PREDATORS, kende nan den un forma dramatico a wordo destrona na ultima ora despues di un serie sumamente spannend cu a bay “the distance”, 5-4; 5-1; 4-5; 3-5; 3-5! Hut Predators a sa di domina gran parti di e decada actual, logrando e titulo maximo na 2000, 2002, 2003, 2004, 2007 y 2008. Sinembargo pueblo billaristico tabata desea un “cambio” y esaki a sosode na un forma cu ni na Hollywood nan no por a pensa, ora den ultimo rack un tiro “kamikaze” di e “sicario” di Predators a “Bonske” malamente y tumba bola 8 abou acsidentalmente. Futuro astro den billiard, “zo vader zo zoon”, Dufi Ras JR, tabata tin e honor di tuma e trofeo y premio.
Na prome lugar, campeon 2009, a keda e legendario equipo di Noord, kendenan despues di un secura di 8 anja a sa di duna Predators un “12/8 alternativo”! BARRACUDA, e team cu mas historia di billard aqui na Aruba, bou guia di Aaron Franken, cu e “mañoso” Pepe La Rosa como MVP, apoya door di perseverancia y optimismo indestructible di hungadornan manera Richard Wolff, Indio Kelkboom, Upi Tromp, Miguel Tromp, David Brete, Lucas Tromp, Vicente Henriquez, “Sheik” Orman, David Franken, e generacion nobo di “mariachi” nan Reno Tromp y Marlon Tromp, y demas integrantenan. Un pabien grandi pa e campeon nobo, e sub-campeon, un palabra di apresio grandi pa e patronisador Coors Light, y pa tur team y fanaticada cu anja aden anja afo ta hiba billiard dilanti.

Users' Comments

Average user rating

(0 vote)

Add your comment

No comment posted

< Prev		Next >

Walk with a Friend BY Colegio Arubano