| on Friday, 15 January 2010
|
Published in : , Futbol |
STA CRUZ-Diahuebs atardi a toca turno pa e scolnan di sector Santa Cruz hunga e weganan programa pa haya clasificacion di e scolnan pa semi final di futbol escolar den categoria B-mucha muher.
For di comienso di e weganan den poule A di sector Sta. Cruz a bira conoci cu Kukwisa School a cay afo, cual a pone cu Colegio Pastor Kranwinkel, Maria School y Colegio Laura Wernet Paskel a sigui cu e weganan riba schedule.
Colegio Laura Wernet Paskel cu a gana tur su weganan a finalisa na prome lugar pa sector Sta. Cruz. Mientras cu Maria School y Colegio Pastor Kranwinkel a hunga diahuebs atardi riba cancha di Johan Cruyff na Jaburibari, pa mira cua ta e scol cu ta clasifica. Yen di emocion e wega a start y a resulta den un wega fuerte di ambos banda cu deseo pa logra score goal.
Colegio Pastor Kranwinkel tabata e prome pa score un goal y tabata na di 10 minuut di wega cu Shayna Werleman ta lora e bala den goal. Apenas dos minuut despues a sigui otro hugada y Shayna un biaha mas ta haya e bala pa score e di dos goal pa Colegio Pastor Kranwinkel. Pero e hobencitanan di Maria School no kier entrega y ta logra na di 14 minuut di wega pa habri e score. E prome goal ta cay despues cu Diana de la Rosa ta haya un bunita oportunidad y ta probecha di esaki pa haci e wega 2 pa 1. E hobencitanan di Colegio Pastor Kranwinkel tabata tin e firme meta pa bay cu e triunfo y na di 16 minuut di wega, riba un tremendo hugada, Siljee Feliciana ta score e di tres goal di Colegio Pastor Kranwinkel. Maria School a sigui purba pa haya e goal, pero esaki no ta logra y referee Mildred Wever ta fluit pa termina e wega cu ta caba 3 pa 1 na fabor di Colegio Pastor Kranwinkel cu ta clasifica na di dos lugar pa scolnan di sector Sta. Cruz den e semi final di futbol escolar categoria B-mucha muher organisa pa IDEFRE.
Sector San Nicolaas
Scolnan di sector San Nicolaas cu a inscribi pa participa tabata Commandeur Pieter Boer School y St. Paulus School. Weganan di sector San Nicolaas mester a tuma lugar diabierna atardi riba cancha di Johan Cruyff na Jaburibari, pero pa motibonan imprevisto y inespera, Commandeur Pieter Boer School ta cancela su participacion. Esaki ta pone cu St. Paulus School automaticamente ta pasa pa semi final cu ta tuma lugar dialuna dia 18 di januari 2010.
IDEFRE ta recorda tur scol cu a clasifica, pa nan tey na ora pa e weganan. Y tambe ta invita tur docente, alumno, mayor y esnan cu ta gusta futbol, pa bin apoya nos hobencitanan den nan wega na caminda pa campeon den futbol escolar mucha muher caterogoria B. Un y tur ta bonbini na cancha di Johan Cruyff na Jaburibari.
|
|
|
| Users' Comments |
|
Average user rating
 (0 vote)
|
|
Add your comment
|
.JPG)
