SportsAruba.com - Aruba Sports News Provider - Softball Escolar di IDEFRE ta sigui den full swing

Softball Escolar di IDEFRE ta sigui den full swing

on Wednesday, 03 February 2010

Published in : , Softball

STA CRUZ--E torneo di softball escolar organisa pa IDEFRE ta continua riba veld di Aruba Juniors y veld di Noord Cura Cabay. E scolnan ta presenta y e weganan ta yen di emocion entre e hobencitanan.

Weganan riba veld di Noord Cura Cabay
Dialuna a tuma lugar e wega entre Commandeur Pieter Boer School y Colegio St. Teresita. Prome inning a bay lihe cu cero careda pa ambos banda. Den e di dos inning, e hobencitanan di Colegio St. Teresita a haya e ‘feeling’ di softball y a bati hit tras di hit pa finalmente score un total di 5 careda. Den bom di e di dos inning, Commandeur Pieter Boer School a purba drenta den e ambiente di wega pero no ta logra score careda.
Den cabes di e di tres inning, e motor di Colegio St. Teresita ta start un biaha mas y nan ta logra score 5 careda mas pa haci e wega bira 10 pa 0 na nan fabor. Lomba contra muraya e hobencitanan di Commandeur Pieter Boer School ta cuminsa bom di e di tres inning, pero nan no ta entrega. Den e inning aki, e hobencitanan ta cuminsa ‘touch’ e bala y hit ta cuminsa lora riba tereno pa score un total di 4 careda E di cuater inning ta cuminsa hopi activo pa Colegio St. Teresita, cu definitivamente ta demostra e deseo pa gana e wega, y ta score 8 careda mas pa sigura e victoria riba nan nomber. Pa conclui cuater inning completo, Commandeur Pieter Boer School ta haya su turno pa bati. E hobencitanan ta logra score solamente 1 careda mas y e wega ta bira 18 pa 5. Pa medio di knockout Colegio St. Teresita ta gana e wega contra di Commandeur Pieter Boer School y asina e weganan di dialuna ta conclui.

Weganan riba veld di Aruba Juniors
E torneo di softball escolar riba veld di Aruba Juniors ta continua diahuebs atardi pa 3:00 p.m. cu e weganan di semi-final, mientras cu diabierna atardi pa 3:00 p.m. ta tuma lugar e wega final.

IDEFRE ta invita tur amante di e deporte di softball pa bin presencia e weganan y tambe apoya nos hobencitanan den nan torneo di softball escolar. Esaki sigur ta un estimulo grandi, pa nan por duna lo mihor di nan durante e weganan.