| on Saturday, 27 February 2010
|
Published in : , Noticia |
STA CRUZ --– Directiva di Fundacion Movemiento ta Bida a constata cu mas di 77 porciento di adulto y casi 40 porciento di hobennan riba nos isla ta sufri di sobrepeso. Ademas di esei por observa un tendencia creciente. Mas di 75 por ciento di e hobennan cu ta bai scol no ta move of no ta haci esaki suficiente ni cu regularidad.
Ta pa tal motibo tur hende riba nos isla mester bira consciente cu movemento ta algo bon, sano, promove prestacion y crea amistad.
Movemento ta bon!
Indudablemente cu deporte y movemento por lo general ta algo bon pa haci. Dor di move regularmente lo bo ripara mas liher cu hopi asunto ta wordo haci mas facil. No por keda sin expresa e aspecto placentero cu un hende ta experiencia ora cu e move hunto cu su famia-, amistad- of coleganan y e bon contactonan cu ta surgi for di esaki.
Movemento ta sano!
Movemento regular ta reduci e riesgo cu ta causa malesa di corazon y di ader, diabetis (un di e mayor problemanan di salud na Aruba), cancer den tripa, obesidad, preshon halto y varios otro malesa. Ademas movemento suficiente ta yuda mantene e peso riba nivel y e ta mantene weso, musculo y conyuntura sano. Deporte y movemento ta hunga un rol sumamente importante tambe den salud mental. Esnan cu ta move continuamente tin un mihor imagen di nan mes y no ta sufri di angustia y depresion.
Movemento ta promove prestacion!
Hende saludabel ta presta mihor tanto fysicamente como mentalmente. Prestacion riba su mes no mester ta un meta, pero si ta agradabel ora cu bo ta sobresali durante actividadnan deportivo of di movemento.
Movemento ta crea amistad!
Movemento ta un di e maneranan bunita pa bin den contacto cu hende. Dentro di e gruponan di movemento ta surgi amistadnan bunita, y te hasta duradero. Dor di haci deporte y movemento cu otro persona bo ta crea un laso y esaki ta stimulabo pa mantene e laso aki riba un nivel regular.
Ban move pa un bon causa!
Directiva di Fundacion Movemiento ta Bida ta desea pa stimula entusiasmo serca atletanan en particular y e pueblo di Aruba en general pa forma nan team pa un bon causa. Pa por aporta na un Aruba mas sano y den movemento e Fundacion lo pone 25 bicicleta riba e beach di MooMba, riba e dianan 17 y 18 di April 2010. T’asina cu un famia, empresa of asosacion/organisacion por adopta un bicicleta pa e suma di mil florin. E intencion ta pa ora cu e famia, empresa of asosacion/organisacion adopta e bicicleta nan mester forma un team cu lo tene e bicicleta aki den movemento pa 24 ora. Un persona ta core bicicleta pa 50 minut, despues ta bin e tempo pa cambio, pues un otro persona di su team ta subi e bicicleta. Un team ta consisti di minimo 8 y maximo 24 persona. Cada miembro di e team ta ricibi un carchi di patronisacion pa por recauda fondo serca amistadnan, famia, bisiña y conocirnan. Esaki ta ensera cien florin pa ora. E suma aki tambe ta bai den pot pa e bon causa. Di e forma aki nos tur ta contribui na un Aruba sano y delega atraves di e deporte di ciclismo.
|
|
|
| Users' Comments |
|
Average user rating
 (0 vote)
|
|
Add your comment
|
.jpg)
