| on Saturday, 06 March 2010
|
Published in : , Basketball |
ORANJESTAD – E equipo di basketball Masters di Aruba Juniors a participa den e fin di siman di 20 y 21 di februari na un torneo nacional teni na Punto Fijo como parti di 10 dia di celebracion na ocasion di 40 anja di existencia di e ciudad, cu participacion di e seleccionnan di Aragua, Barinas y Falcon mes.
Nos equipo local a split den resultado.
A bira practicamente un tradicion cu e team di Aruba Juniors ta perde su prome wega di cada torneo internacional y despues ta bons back. Diasabra atardi no tabata un excepcion, aunke cu Aruba tabatin un bon prome mitar contra di e seleccion di Aragua.
E prome quarter a mustra un Aruba Juniors mas den domino di e wega defensivo y a termine cu ventaha di 9-13 y cu bon actuacion ofensivo di Mario Perez y Levi Talavera. Den e segundo, Aragua a busca su solucion contra e man-to-man di Aruba door di bira den e defensa cada biaha cu nan hanya e bala y forsa asina nan caminda bai aden, provocando foulnan, un tras di otro. Aki nan a bin outscore Aruba pa drenta sociego cu e minimo diferencia di 26-25.
Den e segundo tempo Aragua a sigui e mesun tactica y a hasi fiesta cu e team di Socotoro. Varios di e hungadornan clave tabata riba banki cu 4 foul y nan a probecha pa score 50 punto den e mitar aki, contra apenas 30 di Aruba y esaki a hundi Aruba cu 76-55. Fuera di e debilidad ey di no por a utilisa su mihor hungadornan, el a contribui tambe pa Aruba Juniors tabatin demasiado perdida di bala, loke a afecta e moral di e team, sin cu nan por a gana nan composicion back. E no tabata un bon comienso pa e team y e pregunta a keda si e team lo ta fit pa e siguiente wega.
E topscorernan local tabata Mario Perez 14, Luis Tromp y Levi Talavera cu 10 punto.
Diadomingo mainta e scenario di wega den Gimnasio Fenelon Diaz tabata full otro. Aruba Juniors a analisa ki e mester hasi otro pa duna mihor bataya. Un di nan tabata cu cada defensa mester “front” su hungador pa asina evita cu e por hanya e bala. Claro cu esaki ta trese e aspecto vulnerabel cu por pasa e bala over di e defensa y e hungador contrario ta hanya su so cu basket. E triki ta pa e defensa ta asina alerto cu e ta keda cambia cada biaha di “front” pa “back” defense.
E cambio di tactica aki a resulta fulminante pa e team di Barinas, cu tabatin un ventaha amplio di estatura. Luigi Bergen, encarga cu e center contrario a hunga un defensa sublime. El a percura pa neutralisa e hugadanan di e wega paden sin hanya su mes den problema di foul.
Den e prome quarter Aruba Juniors a mustra cu e tactica nobo por duna resultado, pero asina mes e ventaha na final di e tempo tabata apenas 12-10. Den e siguiente quarter a agrega un tactica nobo y esey a caba di bira e wega cabez abao. Ya cu defensivamente, Aruba Juniors tabata asina efectivo, forsando Barinas pa tuma shotnan pura, di afo y menos bon, nos team tabata pone nan hera hopi y Aruba tabata gara mayoria di e rebotenan. Aki a introduci fastbreak pa por traduci e dominio den punto, lansando specialmente Erwin Ruiz y Mario Perez como punta di ataque pa score basketnan facil. E tactica aki a bira desastroso pa Barinas. Den e quarter aki Aruba a outscore Barinas cu 24-7, pa asina drenta halftime cu ventaha amplio di 36-17.
E segundo half a start bon, pero meimei di e tercer quarter ta manera nan a pone un tapa riba e renchi caminda Aruba Juniors ta shoot, ya cu e team a keda pega mas cu 5 minuuut riba 48 punto. Aruba a hera hasta 7 tiro liber consecutivo y varios bala bao di basket. E ventaha di 20 punto a baha te na 48-35 na final di e quarter, pero a sigui baha mas den e ultimo quarter pa yega te na 10 punto.
Anotando e ultimo di su dos tironan liber Levi Talavera a kibra e mala racha. E hugada mas determinante di e wega a pasa un rato despues ora cu Luis Tromp ta score no obstante cu nan a foul e y el a agrega e tiro liber pa pone su team “back on track”. Score final a bira 68-52. Mario Perez a score 17 punto prome cu ela foul out cu 4 minuut mas di wega. Erwin Ruiz a marca 19 punto y Levi Talavera 11.
Aruba Juniors sin duda tabata un biaha mas e team di mayor edad. Mientras cu otro teamnan tin apenas un of dos hungador di 50 aña, Aruba Juniors tin 3 hungador cu ta reuni casi 190 aña.
E team di Aruba Juniors ta sumamente popular den exterior basa riba e fama, su estilo di wega diferente y su logro den resultadonan internacional. E fama aki a recore nos region. E invitacionnan cu ta drenta ta hopi mas cu por cumpli cu nan. Awor mes tin invitacion di Surinam pa un torneo internacional y tin sigur tres for di Colombia.
.jpg)
|
|
|
| Users' Comments |
|
Average user rating
 (0 vote)
|
|
Add your comment
|
