St. Augustinus College vs Scholengemeenschap di Boneiro
E schoolnan aki a enfrenta otro diabierna atardi den e prome wega cu a cuminsa pa 4:30 p.m. Tabata un wega rapido di hopi toke di bala entre e hobennan, cual wega Scholengemeenschap di Boneiro a domina practicamente riba esnan di St. Augustinus College. E wega a finalisa cu e score di 10 pa 3 na fabor di Scholengemeenschap di Boneiro. E hungadornan cu a score goal pa Boneiro tabata: Jurgen Rojer cu a score 4 goal, Gerrison Craane 3, Terrence Frans 1 goal, Urnik Rojer 1 goal y Win Chun Xuan 1 goal. Mientras cu pa St. Augustinus College a score Ching Hing Flores, Taffie Koelie y Angelo Koolman, cada un 1 goal.

Apertura
E schoolnan cu ta representa Boneiro, Corsou y Aruba a desfila pa habri oficialmente e Weganan Interinsular 2010 na Aruba. Hefe di delegacion di Boneiro sr. Rudwick Benita, hefe di delegacion di Corsou sr. Eduard Monk, representante y coordinador di Minister di Deporte, sra. Sue-ann Leong y director di IDEFRE a dirigi palabra na e deportistanan durante e ceremonia di apertura.  Despues a tuma lugar sake di e prome bala cu a keda efectua pa sr. Jessy Beukenboom, director di IDEFRE 

EPB-Hato vs Regina Pacis VSBO Corsou
E wega entre e schoolnan aki a tuma lugar despues di e ceremonia di apertura diabierna atardi. E hobennan di EPB-Hato a cuminsa move lihe pero e hobennan di Regina Pacis a reacciona rapidamente pa controla e wega y ta logra domina tambe. Score final ta bira 9 pa 6 na fabor di Regina Pacis VSBO di Corsou cu ta bay cu e victoria. Goalnan di Regina Pacis a keda anota pa Jurensley Martina cu a score 4 goal, Elverick Juliana tabatin 3 goal na su nomber, mientras cu Jermenson Lodovika y Jose Janga a score 1 goal cada un. Pa EPB-Hato di Aruba e 6 goal tabata di Jean-Pierre Fingal, Randy Curie, Irman Tromp, Randy Cabral y David Maduro.

Riba e prome dia di competencia Boneiro y Corsou ta logra nan prome victoria y ta keda warda riba e weganan di diasabra.

Average user rating

   (0 vote)