Alrededor di 3.600 atleta entre 14 y 18 aña di edad a participa na e Weganan di Singapore 2010. Nan a wordo acompaña pa 1.850 oficial, y mas o menos 20.000 voluntario a yuda hasi e organizacion di e Weganan un exito.
Medayanan a wordo gana pa casi mitar di e paisnan participante (93 di e 205 teritorionan). Y e Weganan a inclui algun innovación masha excitante, incluyendo formatonan nobo pa deportenan manera 3-on-3 basketball, ciclismo combina, sprintnan head-to-head den canoe-kayak, y tecnologianan nobo manera e laser gun den pentatlon moderno. Varios deporte a inclui un combinación di equiponan di varios Comité Olimpico Nacional y un combinacion di genero, manera a sosode den e relevo den triatlon, tiro con arco, tenis di mesa, esgrima y landamento, pa menciona algun.

E mas di 50 actividadnan di e programa cultural y educativo tabata extremadamente popular cu e atletanan, asina tanto cu e organizadornan mester a agrega sesionnan adicional. Un di e eventonan cu a wordo ricibi mihor tabata e sesionnan “Chat With Champions”, caminda atletanan por a combersa y hasi pregunta na campeonnan Olimpico Sergey Bubka y Yelena Isinbaeva, cu tabata un fuente di inspiración pa e hoben atletanan. Durante e duracion di 12 dia, casi tur e 3.600 atletanan a bishita e standnan di e World Anti-Doping Agency y UNAIDS, situa den e Youth Olympic Village.

E atletanan cu a participa na e Weganan di Singapore 2010 a wordo acompaña pa 29 Reportero Hubenil, cu activamente a provee informacion na prensa internacional, mientras cu 30 Embahador Hubenil a apoya y conseha nan delegacionnan nacional. Mas cu 40 Atleta Role Model di e Federacionnan Internacional y Comite Olimpico Internacional tambe a ofrece conseho y tips na e atletanan den y pafo di e Villa Olimpico Hubenil.

Interes global pa e Youth Olympic Games tabata hopi grandi, cu mas cu 160 broadcasters ofreciendo cobertura y mas cu 1.900 periodista acredita presente na Singapore. Videonan riba e Youth Olympic Games Channel a wordo mira mas cu cinco miyon biaha, y na un cierto momento tabata e tercer video mas mira riba YouTube mundialmente. Te cu awor, 36 porciento di tur esnan cu a mira e videonan ta bou di e edad di 24 aña. E Weganan a wordo transmiti tambe live online riba e plataforma oficial di Singapore 2010 Webcasting.
Comité Olimpico Internacional a logra acapara atención di un audiencia hoben mundialmente riba Facebook, Flickr y Twitter. Mas cu mitar di e 3.6 miyon fanatico riba e plataforma Olimpico riba Facebook ta entre 13 y 24 aña di edad. E paginanan di Singapore 2010 y Youth Olympic Games awor tin mas cu 100,000 “fans”.
E website di IOC (www.olympic.org) ta ricibiendo su cantidad mas halto di bishitante desde Vancouver 2010, cu mas cu dos miyon pagina mira den luna di augustus so, mientras cu e pagina di Singapore Youth Olympic Games a ricibi mas cu un miyon bishitante desde inicio di e weganan riba 14 di augustus.
E prome edicion di invierno di e Youth Olympic Games lo tuma lugar na Innsbruck, Austria, na 2012, mientras cu e segundo edicion di verano lo tuma lugar na Nanjing, China, na 2014.

Average user rating

   (0 vote)