Presente tabata un representante di Comision Tecnico y representantenan di Atletiek Bond, Softball Bond, Tennis bond, volleyball bond, y Basketball bond. Ausente tabata voetbal bond y baseball bond.

E participacion mas importante di e anochi aki tabata cu e Weganan di Reino lo no sigui mas e anja aki, manera tabata planea na hermana isla Corsow.
Ya desde e Weganan na Den Haag na 2007, e decision entre e tres paisnan tabata cu no obstante e cambio estatal di Antiyas Hulandes, e Weganan lo sigui normal te cu 2011, y despues di esaki lo busca solucionnan pa waak den ki forma e Weganan lo sigui desde anja 2013.
Tambe na Aruba den juli 2009, e tres mandatarionan di Hulanda, Antiyas y Aruba a reuni, y a ratifica e decision cu e Weganan lo sigui normal na anja 2011 na Corsow, y cu e ‘’uitzendende organisaties’’ por wel di cuminsa cu e preparacionan.

Lastimamente e ministro di deporte di pais Corsow a dicidi cu e no ta acepta e proposicion pa laga nan seleccion participa pa ultimo vez como e ‘’Antiyas di pasado’’, y cu nan lo participa unicamente como pais Corsow. E decision aki a hasi cu e Weganan a keda cancela, como cu no ta tene cuenta cu St. Maarten y e Bes-eilanden.
E solucion pa rebiba e Weganan di Reino ta cu e mandatarionan responsabel di e 4 paisnan (Hulanda, Corsow, St Maarten y Aruba)  mester bai interveni y yega na un palabracion nobo con lo sigui den futuro cu Weganan di Reino y laga Stuurgroep Koninkrijksspelen traha riba un plan nobo y dicidi na unda e siguiente Weganan lo tuma lugar.
Mirando e hecho cu for di comision tecnico SKA a ricibi e informe cu mayoria di e seleccionnan ta train na un manera hopi serio, SKA ta buscando un evento alternativo di nivel internacional pa laga e atletanan cu ta den preparacion por bai competi na dje. Muy pronto SKA lo emiti mas informacion riba esaki.
Finalmente SKA kier participa cu aunke cu rumornan tabata core for di fin di anja pasa cu Curacao a cancela e weganan, SKA na un manera responsabel a warda te ora cu a ricibi un comunicado oficial for di presidente di Stuurgroep Koninkrijksspelen, pa despues informa tur e federacionnan envolvi.
E mensahe a bay na tur federacion pa sigui cu entrenamento di e seleccionnan, ya cu SKA ta buscando un bon alternativa pa no demotiva e atletanan cu a wordo perhudica, sin cu nan tin falta den esaki.
Den nomber di directiva di Stichting Koninkrijksspelen Aruba,

Average user rating

   (0 vote)