Despues di tremendo encuentronan deportivo Olimpiada Escolar 2011 ta yega su final awe diasabra. E ceremonia di clausura ta tuma lugar den Compleho Deportivo Frans Figaroa na Noord y ta culmina cu e weganan final di futbol categoria-A mucha homber.

E prome wega ta inicia ya pa 4:00 p.m. y ta entre e hobennan di Scol Basico Washington y Colegio Pastoor Kranwinkel. Pa 5:00 p.m. e siguiente wega ta cuminsa unda Reina Beatrix School ta topa Scol Basico Washington. Y e di tres y ultimo wega ta bay entre Colegio Pastoor Kranwinkel y Reina Beatrix School. E weganan entre e 3 school aki ta bay defini e final pa campeon den e categoria-A di futbol mucha homber pa Olimpiada Escolar 2011. Despues di e wega ta entrega trofeo y medaya di biaha na e schoolnan.

Durante e atardi aki tambe ta entrega premio y vouchers na e schoolnan cu a resulta ganador den nan respectivo competencia di Olimpiada Escolar 2011. Tambe tin un premio special entre tur hungador cu durante di e competencia den nan disciplina di deporte a resulta como hungador mas valioso.

IDEFRE ta invita tur MVP’s pa nan ta presente na e ceremonia di clausura di Olimpiada Escolar 2011, como tambe e schoolnan cu a participa e aņa aki.

IDEFRE ta gradici tur prensa cu durante e encuentronan deportivo a sa di cubri cada competencia, alabes ta invita nan tambe pa ta presente na e clausura di Olimpiada Escolar 2011 den Compleho Deportivo Frans Figaroa na Noord.

Un invitacion cordial ta bay ta henter pueblo di Aruba pa bin apoya nos hobennan den e ultimo competencia di Olimpiada Escolar 2011, e grandioso wegananan di futbol den categoria-A mucha homber. Entrada ta completamente gratis.

Average user rating

   (0 vote)