De un solo palabra tremendo! Un bon iniciativa cu merece un continuacion tur anja. Esaki nos por conclui di e AVB All Star Game diaranzon anochi den un stadion di Frans Figaroa na Noord, lamentablemente no mucho yena di fanaticada manera a ser spera.

Den e minutnan inicial di e promer tempo, tur dos equipo a haya dos bon chens di bai ariba, pero e delanteronan no a logra anota gol. Na di 6minut, un error di e defensa local, Ricky Delecca(Dakota) por poco a pone Alex Tejada(Bubali) pone International Stars bai ariba, pero portero Dania(Britannia) ta pomp e bala manda corner. Ta bon pa bisa cu den e prome tempo, e delantero Tejada(Bubali) di Internacional Stars a haya sigur dos chens morto di anota gol, pero e no por a logra vence portero Dania. Na di 12min, e equipo di National Stars ta bai ariba ora cu Jean Polle Tromp(Britannia) ta coi e bala y. avansa ariba un contra atake, aki e ta duna un "steekpass" perfecto na Erik Santos(RCA) kende ta kita e defensa Matute(Riverplate) y cu un tiro lastra den skina robez e ta bati portero Maestre(RCA) pa e 1 - 0, pa National Stars.
Asina mes e equipo Internacional no a paraketo pero a buska tur forma pa empata e partido. Na di 18min, e delantero venezolano Raymond Jimenez(Estrella) ta volley un bala tremendo lora pa Conceicao, pero aki e bala ta pasa net banda di e palo di gol. ybai afor.
Analisando e partido te na e momento ey, nos a mira un prome tempo basta pareu, cu e astronan internacional cu miho toke y dominio di bala. Sigur den e parti defensivo e astronan internacional tabata tremendo cu Mavarez(Estrella), Ramirez(Bubali) den centro hunto cu Valladares(Bubali) y Matute(Riverplate) na linea, pero asina mes e atake di nos astronan local comanda pa Nino(Britannia), Mau(RCA), Erik(RCA) y Jean Polle(Britannia) a duna hopi dolor di cabez na comienzo. Di otro banda e atake di e equipo Internacional cu Tejada(Bubali), Jimenez(Estrella) y Conceicao(La Fama) a haya varios chens di bai ariba, e linea defensivo di e equipo Nacional cu Pancho(Estrella), Ruiz(Britannia), Quandt(Riverplate) y Taylor(Estrella) tabata tin un prome tempo super pisa.
Na di 29, un bon combinacion Internacional entre e bolante Valdo(Deportivo Nacional) y e delantero Tejada(Bubali) a pone e ultimo hera un tiro apenas dos meter for di e gol defendi pa Dania(Britannia), kizas e mihor oportunidad di henter e prome tempo. Un rato despues tabata Jimenez(Estrella) kende ta cabeza su so, pero esaki ta cai den man di portero Dania(Britannia). Asina tambe e prome tempo a bai aden cu National 1 - International 0.

Den e segundo tempo, ambos equipo a haci nan cambionan nesecario. Rapidamente pora mira claramente cu e plantela Internacional a bin dicidi pa empata e partido. Na 52min, Tejada(Bubali) ta haci bon atake na banda robez, aki e ta los un tira duro ariba gol, pero portero Kenny Dania(Britannia) ta pomp, pero Gleison Barros(La Fama) ta rebota cu tiro duro den skina drechi pa e 1 - 1. Pero ni un rato despues,e astronan Nacional ta bolbe bai ariba ora cu un tiro liber crusa pa Ricky Delecca(Dakota) ta cai ariba cabez di Mau Escalona(RCA), kende ta vence e portero di e equipo Internacional Bedoya(La Fama) pa e 2 - 1, aki henter e linea di defensa keda para anto wak Mau cabeza den gol. E alegria di e equipo National no a dura ni cuater minut, paso den un tremendo hugada di e equipo International cu a cuminsa di for di defensa ta yega serca e defensa robez, Carlos Valladares(Bubali), kende ta pone un cruse perfecto cu ta cai ariba pia di Albert Francis(La Fama) kende sin basila ta los un misil y empata e partido 2 - 2. Mas cu claro den e etapa complementario e partido a bira un fisico caminda arbitro Colina mester a hala atencion di e hungadornan, sigur despues cu e equipo di Internacional Stars ta anota un gol, pero Gleison(La Fama) parece a hinka e bala cu su man y a mira su gol ser anula. Asina e partido a termina den un empate na dos. Ariba insistencia di ambos equipo a bai over na e tironan di penal. Aki astronan National a bin gana cu e score di 5 - 4, despues cu portero Di. E equipo National esta Kenny Dania(Britannia) a para e prome penalty ehecuta pa Alex Conceicao(La Fama). Nos tin cu bisa cu esnan presente a mira un gran partidazo di futbol, nos sigur a disfruta die partido aki cu a demostra un bon nivel di futbol. Un revancha ta na caminda, esey ta sigur. Ki dia precies nos no sa pero keda pendiente, paso esnan. Internacional a laga sa cu cosnan no a caba akinan. Na final e Comision organisador a haci entrega di e medayanan na ambos equipo, mientras miembronan di Prensa Deportivo presente a scohe e portero di e equipo National,esta Kenny Dania(Britannia) como e MVP di e AVB All Star Game 2012. Portero Dania a ricibi su trofeo for di man di Sr. Rufo Kelly, na kende a trofeo a ser jama. Un palabra di pabien na AVB cu su prome All Star Game.
(multithumb)

Average user rating

   (0 vote)