A peticion di un club di ping pong di Corsow, Aruba Table Tennis Association (ATTA) a ricibi dos team di Corsow e fin di siman cu a pasa pa un torneo di fogeo contra Aruba. Diasabra a tuma lugar e evento di teams caminda Corsow a participa cu dos team y Aruba cu tres.

Aruba 1: Mario Lobo, Andy Gomes y Remy de Lange
Aruba 2: Rocky Ras, Michael Ling y Franklin Lopez
Aruba 3: Lifrendy Lampe, Shawn Vlaun, Maurice de Kort y Cendrick van der Linde
E teamnan di Corsow a consisti di:

Corsow 1: Dimitri Leon, Michael Dalnoot, Eric van Veenendaal
Corsow 2: Sigmar Carmelia, Luigi Roy Mathilda y Fuyang Zhen
E resultadonan di e teamsnan ta lo siguiente:

Aruba 3 ta perde contra Corsow 2 cu un score di 1 – 4 caminda e talentoso hoben Maurice de Kort ta logra gana Fuyan Zhen cu un score di 3 – 0. Aruba 1 y Aruba 2 tabata mucho fuerte pa Corsow 2 caminda ambos ta gana cu un score di 5 – 0. E equipo di Corsow 1 ta gana di e hobennan di Aruba 3 cu un score di 5 – 0. Aruba dos si tabata fuerte y ta gana Corsow 1 cu un score di 4 – 1 caminda Rocky Ras ta logra gana e campeon di Corsow esta Dimitri Leon cu un score impresionante di 3 – 0. Aruba 1 tambe ta gana di Corsow 1 cu un score di 4 – 1 caminda e sorpresa mas grandi tabata e derota di Dimitri Leon riba campeon di Aruba Mario Lobo cu un score di 3 – 0.

Diadomingo e torneo di fogeo a continua cu e evento di individual. E total a tabata 19 atleta inscribi pa e evento aki. Lamentablemente dos atleta estelar di Aruba no por a participa pa motibonan personal kende ta Rocky Ras y Remy de Lange. E prome ronde tabata e sistema di “round robin” caminda e dos promenan ta bay door pa e afvalsysteem. Den e kwart finale Mario Lobo ta gana di Sigmar Carmelia, Michael Ling ta gana Franklin Lopez, Andy Gomes ta gana Michael Dalnoot y Dimitri Leon ta gana di Wing-Chow Leong. Mester bisa cu Wing-Chow Leong a duna un bon bataya contra Dimitri Leon y casi a percura pa un sorpresa ora e tabata gana 2 – 0. Pero lamentablemente Dimitri su condicion ta un poco miho caminda toch e la logra gana di Wing-Chow cu un score di 3 – 2.

Den semi-final Mario Lobo ta gana di Michael Ling cu un score di 4 -1 y di otro banda Dimitri Leon y Andy Gomes a percura pa un bon show pa tur cu tabata presente. Den e evento di teams Andy a gana Dimitri cu un score basta facil di 3 – 1. Pero diadomingo Dimitri a bin mas fuerte y ta gana Andy cu un score di 4 – 2. Mirando cu Dimitri Leon a gana Mario Lobo den e evento di teams, Mario a bin determina pa tuma su revancha den e final di e evento di individual.

Den un wega cu hopi entretenimento Mario a bay ariba cu un score di 3 – 1. Pero atrobe Dimitri a percura pa un sorpresa ganando e di 5 set cu un score di 12 – 10 pa asina bay na e di 6 set. Den e di 6 atrobe e wega tabata preta pero Mario Lobo a logra termina e wega 11 – 9 y pues ta sali e vencedor absoluto di e torneo di fogeo.

Aruba Table Tennis Association ta gradici tur e atletanan cu a participa y esunnan cu a bin wak e weganan y especialmente e fanaticonan cu tabata masalmente presente ambos dia. ATTA kier a invita tur hende pa bishita nos facebook page: Aruba Table Tennis caminda tin hopi potret y tambe algun video di e wegananan final.
(multithumb)

Average user rating

   (0 vote)