Diamars ultimo a sali rumbo pa Lugano, Suissa, dos atleta hoben cu ta forma parti di e seleccion di AZB den e deporte di Landamento synchronisa, esta Kyra Hoevertsz y Alexandra Mendoza Torres. Nan a wordo companja pa e coach Alva Torres.

Nan lo bai participa den e competencia "Swiss Youth Open" na Lugano, Suissa.

Kyra Hoevertsz ta ganadora di e "Premio Excellencia den Deporte" pa e categoria infantil femenino di Aruba pa e ultimo dos anja.

Na suissa Kyra y Alexandra lo competi den e parti tecnico di landamento synchroniza, esta e parti di figuras.

Banda di e parti tecnico di e figuranan ,tambe tin e competencia di e rutina.

Kyra lo participa den e evento individual, esta " Solo" y hunto cu Alexandra lo participa den e evento di "Duet".

Den competencia di landamento synchroniza e medayanan ta wordo determina 50 % ariba e puntonan recibi den figura y 50 % riba e puntonan recibi den rutina.

Esaki ta e di dos anja cu Aruba ta participa den e campeonato aki. anja pasa Kyra Hoevertsz tambe a competi den e categoria di 13-15 anja,pero solamente den e eventoindividual di "Solo". E anja aki ta conta cu participacion di diferente club di Suissa mes, tambe e seleccion nacional di Suissa, y tambe tin participacion di otro paisnan manera Corsou, Venezuela, Italia y Israel.

E espectativanan pa nos dos atletanan Kyra y Alexandra ta hopi positivo pa e competencia e anja aki.
 

Average user rating

   (0 vote)