Diasabra venidero, dia 28 di april, Aruba Wieler Bond ta organisa un atardi di lectura pa su miembronan tratando asina 2 tema di suma importancia den e deporte di ciclismo, cual ta Dopaje y Nutricion. Dopaje den ciclismo lamentablemente a bira algo basta comun y riba tereno internacional, hopi ta wordo hasi pa preveni cu dopaje ta sigui infiltra su mes den e deporte aki.

Nutricion di otro banda, ta keda un topico di suma importancia pa e ciclista. Ciclismo ta un deporte cu ta exigi hopi di e curpa humano y pa e atleta por duna su miho prestacion, su nutricion mester inlcui lo necesario pa por cumpli cu tur e exigencianan di e curpa atleta. Hopi biaha, atletanan ta recuri na formanan controversial pa asina duna e curpa e ventaha adicional, sea ta pa recupera mas lihe of pa duna mas stamina pa e curpa por sigui competi. Sin embargo, net akinan ta caminda e atleta ta core e riesgo mas grandi di por test positivo pa dopaje, door di cu e no sa kiko e ta tumando. Pesey e 2 temanan aki ta bai man den man cu otro. Sra. Patty Portier, como nutricionista, lo keda encarga pa e tema di nutricion.

Esaki ta di 2 biaha cu Aruba Wieler Bond ta organisa un lectura riba e temanan aki, y asina tin hopi mas lectura planea pa e anja aki, riba varios otro tema di gran importancia pa nos miembronan. Asina AWB ta trata na cumpli cu un di su metanan primordial, cual ta educashon y desaroyo general di su miembronan.

Manera ya nos a indica, e lectura lo tuma lugar diasabra awor 28 di april di 1’or pa 5’or di atardi na ATIA Building na Dakota.

E lectura aki ta gratis pa tur miembro di Aruba Wieler Bond, pero mester registra di adelanta. Pa esnan cu no ta miembro, pero como atleta lo desea di atende e lectura aki, esaki tambe ta posibel. Djis manda un e-mail na This e-mail address is being protected from spam bots, you need JavaScript enabled to view it y nos lo mandabo e formulario di registracion of por bel na 6-900-400 pa mas informacion. Tambe por bishita nos facebook page “Aruba Wieler Bond” of nos website www.arubacycling.net pa download e formulario di registracion.

Average user rating

   (0 vote)