| on Wednesday, 25 April 2012
|
Published in : , Futbol |
.JPG "RCA-Riverpl (10).JPG")
E fecha 16 di e campeonato di AVB ta tras di lomba y tin varios sorpresa a cai den week end y cos ta birando hopi interesante pa loke ta e ultimo puesto pa drenta e playoff nan semi final. Diahuebs anochi Bubali ta topa Britannia caminda cu e Pumanan di Piedra Plat ta duna e Orguyonan di Noord un banjo di awa frieuw y ta golea nan 5-1.
E golnan di Britannia a wordu anota pa Jeffrey Rolston na di 17 minuut, Alejandro “Chando de Lange” na di 42 minuut, Luis Carlos Croes na di 49 minuut, Theric Ruiz na di 77 minuut y Sebastian Montoya ta seya e Victoria na di 83 minuut. Pa Bubali Tyron Maria ta score den e minuut final y ta salba e honor di Bubali cu un gol.
Diabierna e Amarillo nan di Dakota ta topa e Naranjadonan di Estrella de otro wega interesante ya cu Dakota tawata jungando su ultimo carta pa wak si ainda e por yega playoff. Estrella tawata tin otro planes y den un wega di “Wild Wild West” ta bai cas cu e Victoria cu score di 4-3. E golnan pa Estrella a ser anota pa Anuar Kock na di 23 minuut, Jean Carlos Ras na di 48 minuut, Alex “Power Ranger” Hassel na di 63 minuut, y Jean Carlos Ras ta score e gol di Victoria na di 88 minuut. Pa Dakota ta score John Lugay na di 32 minuut, Dwayne Alex Raven na di 67 minuut, y Nino Tromp ta empata e wega na 3 na di 79 minuut. Cu e Victoria aki Estrella ta yega 27 punto y ta tabla cu Bubali na di 4to lugar riba e tabla di posishon, pero cu mihor average di gol. Faltando dos fecha mas pa e campeonato finaliza, ta parce cu e ultimo plaza lo wordu dicidi riba e ultimo fecha ora cu Bubali topa Estrella den loke mester bira un wega “no apto para cardiacos.” E wega aki lo tuma lugar di 6 di mei loke lo bira un diadumingo anochi pa 7 or.
Diasabra a habri cu un partido di Division Uno unda Unistars a topa cu Sporting. Sporting ta na prome lugar di Division Uno y Unistars ta bringando pa bay playoff y ta para na di 3 lugar. E partido entre e dos equipo nan aki di Division Uno ta termina empata na 0.Despues a sigui e partido entre Riverplate y Nacional. E muchanan di Madiki ta bringando pa Sali for di zona di peliger mientras cu Nacional ya ta elimina for di playoff, pero ta junga pa defende su honor. Den un wega bastante emocionante e muchanan di Madiki ta sorprende e muchanan di Silo Brete y Riverplate ta bai cas cu un Victoria di 3-2. Pa Riverplate a score Carlos Quandt na di 10 minuut y na di 22 minuut y Pablo Quandt na di 90 minuut. Pa Nacional ta score Deffrey “Zigi” Banton na di 46 minuut y Valdo Leocadia na di 81 minuut. E Victoria aki ta duna Head coach Rudy Dirksz su segundo victoria como entrenador di Riverplate despues cu esaki ta tuma over e team na cuminsamento di e segundo round. Den 7 partido ela sa di gana 2, pero mester remarca cu e team ta hungando structura boa di guia di Rudy y nos ta spera cu den un futuro hopi sercano e por competi atrobe riba un nivel consistente manera ela demostra den e ultimo partido nan aki. Mi ta kere cu nan derota den Copa Betico Croes 2012 na man di Arsenal a fungi como un wake-up call y a pone e club structura su mes y poco poco nos ta cuminsa cu Rudy su idea nan y vission ta cuminsa mustra senial nan cu hopi positivismo
Diadomingo ta habri cu dos partido di Division di Honor riba schedule.Den e prome wega Caravel ta topa cara cara cu e mucha nan di JTL den un wega di “lucha pa sobrevivencia.” E buffalo nan di Tanki Leendeert a cuminsa mustra mehoransa, pero e wega nan a cuminsa bira menos y e holoshi a cuminsa marca 5 pa 12. E bufalonan tawata sa cu nan permanencia den Division di Honor tawata colga na un hilo y un Victoria so lo por a yuda nan Sali di e sotano. E wega ta keda empata na 2, y JTL ta keda cu speransa ainda di por mantene su mes den Division di Honor. E golnan pa Caraval a ser anota pa John Gonzales na di 72 minuut y Leo Garcia na di 87 minuut y pa JTL ta score Luis Salinas na di 68 minuut y Andre Kelly ta empata den pito pa e score final di 2-2.
Despues di e partido aki a sigi candelaso encuentro entre Speransa Berde di Savaneta, SV La Fama contra e tricolornan di Solito, RCA. Sigur un wega hopi atractivo mirando cu La Fama ta na di 3 lugar cu 32 punto y tawata en busca di un victoria pa asina por a jega na un total di 35 y empata na di 2 lugar cu Britania. RCA na otro banda ta na en busca di su 3 punto nan pa asina sigura e titulo campeon di Division di Honor pa di su segundo anja consecutivo. Den un wega bastante atractivo e wega ta termina empata na dos gol pa banda. Pa La Fama a score Bruno Conceicao na di 9 minuut y Albert Roy Francis na di 55 minuut. Pa RCA, ta e joven junioren Jean Pierre Final ta score na di 11 y na di 41 minuut.
E siman aki ta sigi cu otro tremendo encuentro nan. Aki abou ta sigi e schedule. Playoff ta den porta y e team nan bringando pa sigura nan puesto, nos mester lubida cu tur punto ta conta awor aki. Diadomingo awor pa 6:45 PM AVB lo ta live streaming un otro tremendo encuentro entre Bubali vs RCA riba www.avbaruba.aw.
Diaranson 25 April 2012 8:00 PM JTL vs Nacional CDGT
Diahuebs 26 April 2012 8:00 PM Estrella vs Britania CDGT
Diabierna 27 April 2012 8:00 PM Riverplate vs Dakota CDGT
Diasabra 28 April 2012 8:00 PM Caravel vs La Fama CDGT
Diadomingo 29 April 2012 7:00 PM Bubali vs RCA CDGT
|
|
|
.JPG "RCA-Riverpl (10).JPG")
(0 vote)