Den un wega di dos cara diasabra anochi, e ekipo di Britannia ta recupera di su prome derota den e serie semi final di division di Honor, superando e actual campeon RCA, cu anotacion di 3-2. Un partido dramatico cu a conoce un final bergonsoso ora cu no menos cu cuater expulsion ta cay, di cual tres tabata di Britannia, cu ta Gregory Lake,Theric Ruiz  y Jonico Lovell

Den e prome tempo ambos ekipo a Sali busca gol y tabata Britannia cu ta logra habri e marcado pa medio di Sebastian Montonya kende despues di un tiro liber, ta logra pusha e bala cu cabez den net pa duna su ekipo bentaha di 1-0.

RCA ta logra di empata e wega rapidamente cu gol anota pa Steven Rua kende cu tremendo tiro ta supera porter Kendrick Dania pa nivela e marcado na 1-1.

Ambos ekipo a sigui hunga un wega concentra riba atake buscando e gol di bay ariba pero un biaha mas tabata Britannia cu ta tuma bentaha ora cu e medio campista, Luis Carlos Croes ta cobra un tiro liber cu ta supera porter Frans di RCA pa asina e ekipo di Piedra Plat saca bentaha di 2-1.

Un bentaha cu tampoco a dura mucho ya cu riba un atake rapido tabata Erik Santos cu ta logra keda liber y ta supera porter Dania pa asina empata e partido na 2-2 y cu cual anotacion sosiego a bay aden.

DRAMA TOTAL

Mientras cu e prome tempo tabata un propaganda pa bon futbo, e di dos mita a ser domina pa drama y expulsion, principalmente den e ultimo 20 minuutnan di wega.

Den e prome minuutnan ambos ekipo a sigui lucha pa saca bentaha y no tabatin problema alguno na e alturanan ey ainda.

Britannia hasta ta tuma bentaha di 3-2 ora cu e veloz delantero Sebastian Montoya los un tiro fuerte cu portero di Bonaire, Rishison Frans tabatin problema pa contene y e bala ta pasa via di su mannan y bay cay den net pa e di dos gol di Montoya e anochi aki.

RCA mester a cambia su ritmo di wega y mester a bay over na presiona mientras cu Britannia a sigui peligroso den su wega di contra atake pero caminda tabatin confrontacionnan fisico.

Den un di esakinan Gregory Lake ta pone un plancha formal pa e medio campista Steven Rua den un wega hopi peligroso y corectamente referee principal, Oshi Kock ta muster carchi cora direct lagando Britannia cu 10 hungado.

RCA mesora a pasa pa domina e accionnan pero simplemente no tabatin e miho coordinacion pa yega na e gol di porter Kendrick Dania y ora cu nan a logra di haci esaki, e portero di Britannia tabata atento pa trece salbacion.

E situacion a bin empeora den e ultimo 10 minuut di wega ora cu e delantero Juancho Sanchez, haya un confrontacion cu e defense Lovell di Britannia caminda ambos a tira elleboog y haci intento pa golpia otro y riba indicacion di linesman, ambos hungado ta keda expulse lagando Britannia cu 9 hungado y RCA cu 10 riba tereno.

Sinembargo mey mey di tur pushamento y gritamento tabata Theric Ruiz kende ta ricibi su di dos carchi geel di wega y cual a bira un cora lagando Britannia cu e total minimo c’un ekipo por tabatin riba tereno cu ta 8 hungado.

Referee na final a agrega 8 minuut adicional den cual period tur accion a tuma luga dilanti porteria di Britannia pero caminda RCA simplemente no a logra di empata e partido, y asina Britannia a logra un triunfo sumamente importante den e serie semi final aki.

RESPONSABILIDAD

Mientras cu hopi critica a cay riba e cuerpo arbitral, tin cu menciona cu ta keda na tur organisacion, na nan miembronan pa no crea situacionnan caminda refereenan tin cu actua contra din an, perhudicando na propio ekipo.

Britannia den dos partido a mira cinco hungado wordo expulsa y den un caso asina ta dificil punta dede solamente riba e cuerpo di refereenan.
(multithumb)

Average user rating

   (0 vote)