Diabierna atardi, Comite Olimpico Arubano, ARRUWAC y Mc Donald’s a tene un conferencia di prensa na Mc Donald’s na Palm Beach unda a anuncia e gran evento  di canamento y coremento cu lo tuma lugar diadomingo 24 di juni proximo.  Director di COA, Sr. Patrick Werleman a jama tur presente un cordial bon bini y a introduci tur e miembronan den e panel cu lo ta involvi pa cu e magno evento aki.

Secretaria general di COA, Sra. Nicole Hoevertsz a elabora ariba e historia di e Movimento Olimpico, unda el a conta cu tur aņa rond di 23 di juni, Movimento Olimpico ta celebra e Dia Olimpico cual ta un conmemoracion di e fundacion di Comite Olimpico Internacional. Mescos cu aņanan anterior Comite Olimpico Arubano ta celebra e Dia Olimpico aki pa medio di e Olympic Day Run, cual e aņa aki lo tuma lugar riba diadomingo 24 di juni proximo. Segun Sra. Hoevertsz, esaki ta pa di 9 anja consecutivo, cu COA ta organizando e Olympic Day Run den cooperacion directo cu ARRUWAC y awor tambe McDonald’s, patrocinador mundial di e Movimento Olimpico.

Representante di Mc Donald’s, Sra. Marielene Tromp tabata sumamente agradeci cu e compania Mc Donald’s por ta partner di COA pa yuda engrandese movecion na Aruba esaki atraves di eventonan saludabel manera e Olimpic Day Run.

Por ultimo, Sra. Virginia Dirksz y Sra. Vanessa Tromp di ARRUWAC a elabora ariba e parti organisatorio y tecnico di e Olimpic Day Run 2012. Segun Sra. Dirksz, mescos cu aņa pasa e ruta di e Fun Run/Walk lo ta di 5km, mientras e recorido lo inicia panort di Costa Linda Beach Resort direccion Divi Phoenix Resort pa despues bira bek pa Costa Linda Beach Resort, unda e evento lo finalisa. E inscripcion ta completamente GRATIS y desde dialuna 18 di juni tur interesado por inscribi na oficina di COA durante orario di oficina, e oficina di COA ta situa na Stadion Guillermo Trinidad. Pa esnan cu no alcansa pa registra prome cu e evento na oficina di COA, tin oportunidad pa haci esaki riba e dia di evento desde 4 or di atardi na e area di start. E Olimpic Day Run lo cuminsa pa exactamente 5.30 di atardi.

Alabes COA ta informa cu e prome 250 personan cu inscribi lo ricibi un bunita T-shirt di e Olympic Day Run 2012 y na final di e evento TUR participante alabes lo ricibi un Certificado como recuerdo.

Comite Olimpico Arubano ta extende un cordial invitacion na tur coredo y canado y otro interesadonan pa bin participa na e grandioso evento mundial aki. Pa mas informacion por tuma contact libremente cu oficina di Comite Olimpico Arubano na Tel. (297) 582-0031 / 582-0854
(multithumb)

Average user rating

   (0 vote)