Despues cu e seleccion nacional di futbol a keda elimina den e cualificacion di CFU, hopi a specula riba e funcionamento di e seleccion nacional, pero principalmente di su entrenador Elvis "Epy" Albertus. Tur sorto di comentario bo ta tende riba caya, mientras e contesta cla mes ta keda den laira.

BDA Epy cosnan no a bai bon na Barbados durante di e cualificacion di CFU. Bo por splica nos kiko a bai bon y kiko a bai menos bon, tog awe nos a keda cortico pa e siguiente buelta.



EA: Sigur un resultado cu nos no a desea. Nos prome wega nos a hunga cu e team di mas duro den e grupo cu tabata Santo Domingo, nos a hunga un bon wega cual na dos ocacion nos tabata ariba den e marcacion. Di dos wega nos a hunga contra Dominica, sigur un wega hopi duro fisico, nos a wak nan hunga i nos ta sa ki wega nan tin cu ta defende den bloke i contra atake cu nan delentero reks cu tin hopi speed. Den e wega aki nos tabata semper den desventaha pero nos a sa di bin bek den e wega cu bon futbol. Nos ta tin mas posicion di bala, e team cu mas ta ataka pero nos no por a logra di bai ariba.

Mi no ta busca mi fout den otro, pero sigur e no ta facil pa gana e team nan di isla riba den nan region cu nan refree. E momento nan mas crusial di wega bo ta hanja un di dos carchi gel cu ta bira un cora sigur un carchi gel hopi comenta, paso e hungado a drecha su protector di pia prome cu e la scop e bala. Cu 10 hungado mes nos tabata busca tur manera pa bai cu e tres punto, un counter den ultimo min nan ta anota e di tres gol, nos ta perdde 3-2. Sigur cu mas posishon di bala cu miho futbol riba veld bo no ta gana wega bo mester hinca gol.

Di tres wega tabata Barbados, un wega hopi parew cu tur dos por a bai cas cu e victoria, e prome 25 min di wega Barbados a sali hopi duro i tuma e wega over cu hopi preshion den medio campo cual nan ta habri marcacion trempan. Den e ultimo 20 min nos ta tuma e wega over i empata e partido. Den e di dos mitad ta cuminsa mes cos Barbados ta sali duro i nan ta bai ariba 2-1 dje pa dilanti Aruba ta tuma e wega over cu bon futbol sigur na dos ocashion den area penal bala ta dal den man di defensa di Barbados pero nada ta pasa, tackle nan hopi pisa di team Barbados ni un carchi gel i nos ta hanja paso e hungado a tira un freekick prome cu refree a fluit.

Si mi resumi e tres wega nan nos mester por mira cu nos a haya mucho gol encontra cual ta 7 i nos a hinca 5 den tres wega.

Nos mester a sacrifica nos medio campo dor di manda Raymond Baten den defensa banda di Bruinburg dor cu niun di nos dos defensa central no por a biaha dor di scol cu ta Jefferson Vegas y Steve Escalona. Mi ta convensi cu awe nos ta lanta cu cara na laira pasa nos a defende e bandera di Aruba cu hopi balentia. Mi ta manda un danki na tur e hungadonan i Staff, AVB,Subsidie comissie pa nan support.
 

BDA: Epy nos a ripara cu a cambia concepto di forma e seleccion nacional di futbol dor di bin cu hungadornan for di Hulanda. Un concepto cu den comienzo a mustra di a duna bon resultado mirando e resultadonan di por ehempel un COPA ABSC na dos ocasion, pero sinembargo na e cualificacion di CFU na Barbados cosnan no a bai manera desea. Ki segun bo persona ta e diferencia di hungadornan di Hulanda y esnan di Aruba mes. E ta duna mas rendimento mirando e resultado na Barbados of nos mester switch bek y bai na nos propio hungadornan local.

EA: Mi ta full convencie cu nos mester mantene e concepto por lo pronto, nos a sigi train di anja pasa despues di ABCS Suriname entre 7 pa 10 hungado ta bin train, nos mester asumi nos resposabilidat si nos kier forma partie di un selecion Nacional, bo mester hacie bon.

BDA: Nos a ripara cu algun hungador clave di e seleccion nacional a tuma distancia y no a biaha pa e cualificacion, cu otro palabra nan a "bedank". ta wordo bisa cu tin cierto incertidumbre den e ambiente di seleccion. Pakiko e hungadornan aki no "kier" of por a forma parti di e seleccion nacional, nan no ta contento cu e desaroyo.

EA: Manera cu mi a menciona Steve, Jefferson no a bai, ta dor di scol y David(Abdul) ta personal

BDA: Ta ser papia cu e relacion entre entrenador Albertus y e hungadornan Hulandes no ta manera e mester ta. A ser papia cu hasta ta bezig cu otro entrenador. Ki di berdad tin tras di esakinan?



EA: Ami ta esun cu a zorg cu nos por a contact e hungadornan cu a bin di Hulanda y sigur cu nan tin masha aprecio pami y nan a demostra tur momento tanto riba veld como pafor di veld. Tocante otro entrenador mester puntra AVB, ami no sa di esey.
 

BDA: Kiko ta next pa loke ta nos seleccion nacional despues di e disapunto na Barbados.



EA: Entrante 1 october mi contract a termina cu AVB. Nan a avisa mi di luna pasa cu nan NO lo prolonge. Mi no lo comenta nada te cu otro ocacion. Por ultimo mi kier a bisa cu e logro di un anja ta keda pa historia pa AVB. Wak di unda nos a bin y wak awe unda nos ta.

Te asina leu e entrevista cu Elvis Albertus, entrenador di nos seleccion nacional di futbol. Ta spera cu Sr. Albertus su contestanan ta duna un bista cla riba e situacion di nos seleccion nacional di futbol y tur e speculacionnan cu tin rond di esaki. Su contract no lo wordo prolonga dor di AVB, pero riba esey su persona no kier bisa mucho. Nos lo sigui informa.