| 
GO FAST CMB OFF-ROAD ADVENTURE RACE PDF Print E-mail
Monday, 06 May 2013

577708_273515822785376_777973552_n[1].jpg
Go Fast Cycling Team, un ekipo hopi renombra den ciclismo aki na Aruba y patrocina pa Go Fast! Energy Drink a uni forsa cu e tri-atletanan Lars Stolk y Mario Nooijen di “Run for Charity “ pa organisa e GO FAST – CMB OFF-ROAD ADVENTURE RACE, un actividad deportivo den naturalesa pa henter famia dia 12 di Mei na unda lo recauda fondo pa stichting MI POR.

Tri-atletanan Stolk y Nooijen na e momento nan aki ta den pleno preparacion y ta entrena duro ja cu nan lo participa na Iron Man Zurich, Switzerland den luna di Juli 2013. Na caminda pa e Iron Man y durante nan lunanan di preparacion, e tri-atletanan ta recaudando fondo pa por cumpra un bus pa juda Stichting MI POR cu transportacion di muchanan desabilita. Run for Charity ta e nomber cu e dos tri-atletanan a duna e tremendo iniciativa aki.
Un di e actividadnan cu lo juda jega na e meta, ta e GO FAST - CMB OFF-ROAD Adventure Race. E careda aki tin un concepto diferente, pa promove actividad fysico manera coremento, canamento, hiking y mountain biking den nos naturalesa. Pa e motibo aki a scohe e lema “CAN YOU HEAR THE ECO?” cu ta refleha e grito di nos naturalesa pa juda conserva esaki y alaves e lema ta e echo di nos muchanan desabilita cu no por hasi locual cu esnan participando por hasi cual ta movecion.
E actividad aki no ta unicamente pa atletanan pero pa henter famia ja cu e ta consisti di tres diferente actividad; TRAIL RUNNING/WALKING, MOUNTAIN BIKING y FUN WALK/HIKING. Famianan, incluyendo mucha por cana hunto den parke Arikok, riba un ruta di 3 KM bou guia di park rangers. Tambe tin un ruta di 10 KM pa coremento na pia y canamento y finalmente un ruta di 7 KM unicamente pa e desafio riba Mountain Bike.
E GO FAST – CMB OFF-ROAD ADVENTURE RACE ta tuma lugar diadomingo 12 di Mei y ta cuminsa 6:30AM na e Visitor’s Center di Parke Arikok. Registracion riba e dia di careda ta cuminsa for di 5:45AM. E promer actividad e trail running/walking ta start 6:30AM, 7:00AM ta start e desafio riba Mountain Bike y culminando cu e fun walk/hiking pa 8:00AM. Por inscribi na Tri-Bike Aruba, Runners y Radio Shack te cu dia 10 di Mei. Diahuebs dia 9 di Mei tin inscripcion na Urataka Center entre 7:00PM- 8:00PM. Riba e dia aki por pasa pa recoge number tambe. Costo pa e actividad ta Afl. 20,00 pa persona. Tin un prijs special pa famianan participando.
Pa mas informacion di e tremendo actividad aki por tuma contacto cu Go Fast Cycling Team na This e-mail address is being protected from spam bots, you need JavaScript enabled to view it . Tambe por sigui e desaroyo di e evento riba e pagina di facebook di “Run for Charity”. Organisadornan y patrocinadornan, Go Fast Energy Drink y Caribbean Mercantile Bank kier a invita Aruba henter pa participa na e grandioso actividad aki y na mes un momento yuda nos recauda fondo pa Stichting Mi Por.

 

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event