Diabierna anochi a tuma lugar den Centro di Bario Brazil e final di e wega di Basketball entre Caribbean Drip Irrigation y Divi Village.

  Un final cu basta tencion na unda cu ambos team a bin pa hunga pa gana e trofeo, pero manera tur wega semper tin un ganador y un perdedor. Caribbean Drip Irrigation su team cu a consisti di Ana Tromp, Liz Casallas y e famia Klabér a lucha masha hopi mes pa asina por a gana e wega. Caribbean Drip Irrigation a cuminsa hunga Basketball mescos cu e profesionalnan den e prome 9 minuutnan poniendo Divi Village bou menasa, pero esaki no a dura mucho.

  Sheldon di Divi Village kende sa su wega a cambia nan manera di hunga na unda cu esaki a bruha Caribbean Drip Irrigation, despues e referee a saca Alberto Klabér kende a haya 5 foul y Roberto a drenta pa Caribbean Drip Irrigation, pero Maria di Divi Village a sorpresa tur hende cu su shotnan.  Divi Village a haya e confiansa di hinca e shotnan un tras di otro na unda cu e score a sigui subi te ora cu e referee a fluit na unda cu Divi Village a termina campeon den Basketball cu un score di 34-21.  Divi Village a demonstra di ta e mihor team un biaha mas den basketball.

  Un pabien ta bay na Divi Village cu a coy campeon, sigui pa Caribbean Drip Irrigation na di dos lugar y na e di tercer lugar a termina Marriott Hotel y Flora Market. Diabierna awor lo bay sinta cu Glennon Eights pa divulga cua wega lo hunga na luna di Mei pa asina sigui motiva e trahadornan di Landscaping pa sgui haci deporte.