Hopi coredor, officials y fanatico a haci Aruba nan lugar di vacaccion, incluyendo famoso Harold Martin.  Aworaki un grupo di 35 persona di Union, S.C., cual ta e lugar cu ta wordo considera cas pa Team Aruba, ta preparando nan biahe pa Aruba.  Banda di bin gosa di e bunitesa di nos isla, nan meta principal ta pa haci di e biahe aki un mision cristian.  Gran parti di e grupo ta musicante y nan ta sigur cu nan lo haya masha agradabel mes pa canta cancionnan di gratitud mientras nan ta bishitando Aruba.  E grupo aki ta wordo encabesa pa Bobby Hicks, un hende homber cu hopi fe, kende ta manager di operations di Team Aruba na Merca.

  Esakinan ta prueba cu Team Aruba ta haciendo Aruba famoso den a mundo di entre otro drag racing. Mientras cu Team Aruba ta traha oranan largo durante e temporada di careda, ta netamente durante e “off-season” nan esfuersonan pa promove Aruba ta haya nan fruto ora cu gruponan grandi ta bin conoce e raisnan di Team Aruba.  William Cavallo, kende a gana 2 world championships na Pro-Stock tambe ta un fanatico cu a haci Aruba un di su lugarnan di vacaccion. 

  Ta danki na e “word-of-mouth” di tanto e miembronan actual di Team Aruba Crew y esnan den pasado a haci cu hopi di nan famia y amistad tambe a bishita Aruba. Team Aruba y Famia Eman ta wordo considera un grupo hopi special y caluroso.  Nan semper ta traha duro y durante tur careda ta promove Aruba, poniendo entre otro mata di coco nan nan stand aunke cu tin sneeuw mes.

Pronto Aruba lo ricibi bishita di e 35 personan aki acompaña pa Sr. Bobby Hicks. Mientras cu Aruba su esfuersonan riba pista ta hayando mas y mas reconocimento despues di nan exito na 2013, nan meta pa trece mas bishitante pa Aruba ta wordo compli.