Riba e weekend benidero di Diabierna 19 y Diasabra 20 di September, Fast Tracks Mini Drag Racing lo ta celebrando nan di 25 aña cu un tremendo actividad den Centro di Bario Brasil.

Pa recorda e 25 aña di Fast Tracks lo ta organisando un exposicion di documentonan, equiponan y potretnan di loke e deporte di pusta autonan Matchbox y Hotwheels tabata na Fast Tracks su pista cual tabata keda net un tiki prome cu bo yega e pista di Palo Marga na Weg Fontein.   

  Tambe lo bai tin differente coredornan cu lo bin pa expone nan autonan como tambe nan trofeonan y otro premionan cu nan a logra den e deporte aki durante e ultimo 25 añanan, mientras cu Patrick Geerman di Fast Tracks pa di prome biaha lo ta exponiendo su coleccion personal di autonan y otro collectors items pa publico por wak.  Na e parti pafo di Centro di Bario Brazil lo bai tin un tremendo feria cu diferente weganan popular manera e famoso roulette, grabbelton, tiramento di bala y hopi otro weganan mas na unda e muchanan lo por gana diferente premionan atractivo.  Specialmente pa e ocasion aki a logra trece Aruba un pista di Mini Drag completamente moderno cu electronic start, timing system, lus na final cual lo wordo arma pa prome biaha den Centro di Bario Brazil pa asina tanto e muchanan pero tambe e grandinan lo por challenge otro cu nan autonan Matchbox of Hotwheels.  Mirando cu e actvidad aki ta dedica specialmente pa e muchanan lo bai tin riba escenario diferente shownan di gruponan di baile di mucha como tambe diferente otro shownan specialmente pa nos muchanan y e entrada pa henter e actividad aki lo bai ta completamente gratis.  Pues di e forma aki Fast Tracks Mini Drag kier bisa danki y a la vez invita tur esnan cu a yega di core of bin wak careda of di un of otro manera tabata involucra cu e deporte y Fast Tracks pa bin Centro di Bario Brazil Diabierna y Diasabra awor pa asina topa amigonan bieu y recorda e dushi temponan cu nos tur a disfruta di dje practicando e deporte di Mini Drag y na esnan cu kier bin expone nan autonan, trofeo of cualkier otro cos cu tin di haber cu e deporte aki pa por fabor tuma contacto cu Patrick Geerman na telefoon 742-6932 of via e-mail This e-mail address is being protected from spam bots, you need JavaScript enabled to view it pa asina e weekend aki nos por tin un tremendo celebracion den Centro di Bario Brazil, recordando 25 aña di Fast Tracks Mini Drag Racing.  Diabierna e actividad ta cuminsa di 6or di atardi pa 11or di anochi y Diasabra e lo ta di 6or di atardi pa 12or di anochi y ambos dia entrada lo ta completamente gratis pa grandi y chiquito.