| 
Den felis memoria di Ripoldo Croes PDF Print E-mail
Wednesday, 05 November 2014
ripoldo_croes_x.jpg Historia di Ripoldo Croes na cuna di SV Britannia a cuminsa den e prome añanan di decada 50 ora cu un grupo di hobennan tabata hunga futbol den cualkier tereno habri cu nan por haya na Piedra Plat y vecindario.

Tabata tin diferente gruponan chikito no organisa cu tabata hunga contra otro den vecindario manera: Buchi Jan Boys, Tamarijn Boys, Bonny Boys, Chela Boys y algun mas.

  Na Augustus 1957 e prome reunion pa lanta un tema di futbol a tuma lugar den cas di Sra. Mama Chuchu (Johana Sofia) Croes Lampe na Piedra Plat #69 unda cu 19 hoben tabata presente y unda un comicion a wordo instala bao encargo di Sr. Ripoldo Croes como lider cu e unico meta pa cuminsa cu e procedura pa funda un team di futbol oficial pa e hobentud di Piedra Plat y vecindario manera Hooiberg, Pavia, Rooi Afo, Cascogne, Seroe Lopes, Seroe Pita, Casibari, Paradera (Parialmente), S.T. Cruza (parcialmente) Tamarijn, Bloemond y Seroe Preto.

  Den e ruenion aki e colornan di SV Britannia (Probablemente Fechi Bareño) a wordo escohi cu ta geel cu corra.  E nomber Britannia a wordo escohi pa Americo (Merco) Croes.  E nomber  Britannia a wordo escohi pasobra den e tempo aya hopi team di fubol tabata wordo yama na nomber di paisnan cu ta popular den futbol, manera Holandia, Jong Holland (Curacao), Jong Colombia y Jong Aruba.  E nomber Britannia ta deriva for di Great Britain cual pais tambe ta sumamente popular den futbol, na mes un momento e futuro hungadornan di SV Britannia a cuminsa limpia un pida tereno cu a wordo duna na nan door di Sra. Martilia Croes pa e team di futbol di Piedra Plat y vecindario.

  Dia 12 october 1958 SV Britannia a wordo oficialmente funda y publica pa gobernador interino Mr. W.G. Boomgaart.  SV Britannia ta oficialmente situa na Piedra Plat Aruba y un di e metanan mas importante ta di promove tur clase di deporte den vecindario.  SV Britannia ta consisti di miembronan di Honor, Donantenan, Miembronan activo, Miembronan pasivo y junioren.

  E prome miembronan di directiva SV Britannia a wordo instala 12 oktober 1958 y nan tabata: Presidente: Daniel V. (Vale) Croes, Vice Presidente: Henry (Henriche) Croes, Secretario: Ripoldo Croes, 2do Secretario: Roland W. (Rolly) Bareño, Tesorero: Alfredo (Fechi) Bareño, 2nd  tesorero: Serapio (Jati) Weller, Comisarionan: Joaquin Werleman, Hipolito A. (Poli) Pereira, Marcolino (Cholin) Erasmus.

  Presidentenan di SV Britannia 1958 – 2014 tabata Sr. Vale Croes, Juan Henriquez, John Croes, Sixto (Buchi) Feliciano, Rudolf Geerman, Glen Roy Tromp, Ronny Henriquez, Sixto (Titichi) Croes, Marlon Werleman, Eddie Berg y Richard Dijkhoff y Jorgen Jansen.

  Britannia a hunga su prome wega como miembro di A.V.B. dia 4 di April 1959 den e Knockout di B-Klasse pa e Koningin Juliana Beker.  Britannia a gana Estudiantes 3 - 1 y despues di tres victoria mas a yega final contra Mariniers cu tabata e equipo di militarnan Hulandes staciona na Savaneta.  Esaki Britannia a perde 3 - 2 y a keda como sub-campeon.  E Juniorennan a wordo elimina den nan prome wega contra Dakota Jr.  Britannia a hunga su prome wega di e campeonato oficial di A.V.B. dia 16 di Mei 1959 riba su tereno na Piedra Plat contra e mesun Estudiantes.  E biaha aki si Estudiantes a gana 4 - 1 pero Britannia (Ripoldo Croes) a protesta e wega y a gana esaki pasobra Estudiantes a usa un hungador ilegal.  Mas despues e wega aki a wordo hunga di nobo y Estudiantes a gana cu e score di 4 - 0.  Dia 6 di Juni 1959 Britannia a logra su prome victoria derotando De West 6 - 0 den Sport Centrum Noord awe C.D. Frans Figaroa.

  Aña 2001 a bira uno especial pa tanto e directiva, hungador y fanaticonan di Britannia, ora cu despues di cuarenta y tres aña di existencia SV Britannia a logra titula campeon di division prome y promove automaticamente pa Division di Honor.    Den e playoff semi-final Britannia a keda na di dos lugar tras di Sport Boys.  Den e playoff final Britannia mester a bataya duro contra Sport Boys.  Despues di a empata dos biaha Britannia a gana dia 8 di December 2001 e wega decisivo cu e score minimo di 1-0.

  En total SV Britannia a participa 3 biaha den Caribbean Championship di Caribe y a titula campeon di Aruba na 4 ocasion y a titula na 5 ocacion campeon di Copa Betico Croes.

  Atraves di añanan Ripoldo a bai dedica mas tempo na e muchanan di baseball, pero nunca Ripoldo a lubida su team stima esta SV Britannia y semper tabata dispuesto pa duna un man den tur cos.  Den +/- añanan 1990 tambe Ripoldo tabata para na cuna di fundacion C.B. Piedra Plat hunto cu otro voluntarionan y cu awe tambe nos por bisa cu C.B. Piedra Plat tambe ta un di e centro di barionan mas exitoso na Aruba.

  Tres luna pasa Ripoldo tabata invitado especial pa e ocasion special di groundbreaking di contruccion y instalacion di e yerba sintetico pa e veld di futbol di SV Britannia, pero pa motibo di kibrante di salud Ripoldo no por tabata presente.   

  Faltando algun dia pa inauguracion di e veld nobo di futbol Ripoldo a bai laga nos.  Atraves di e comunicado aki pueblo di Piedra Plat y vecindario kier a gradici Ripoldo Croes y su famia di tabata para na cuna di nos organisacionnan y cu awe hunto nos por ta sumamente contento y orguyoso di ta un di e organisacionnan mas grandi di Aruba.  Danki Ripoldo!

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event