| 
Durante rueda di prensa AVB a aclarea cualkier duda PDF Print E-mail
Thursday, 29 January 2015
richarddijkhoff.jpg Diaranzon ultimo President di AVB, ing. Richard Dijkhoff hunto cu Lysander Besselink kende ta miembro di bestuur y a la vez ta ocupa e puesto di vice-Presidente, a tene un rueda di prensa.

E rueda di prensa aki tabata netamente pa aclarea tur rumor of mal entendimentonan cu tin bao di comunidad.  Presidente di AVB a elabora ampliamente riba loke cu a sosode cu e staf technico anterior.  Su persona a splica cu tana tres ocacion cu su persona a sinta cu e entrenador encuestion, kende na mas cu un ocashon tabata kier a termina e palabrashon cu e tabata tin cu AVB, pero cu ta meramente su persona na tres ocacion a percura pa reunie cu sr. Albertsz y asina strika tur e plooinan cu por tabata existi.  Señor Dijkhoff a splica cu e la haci esaki netamente pasobra e personalmente ta kere den sr. Albertsz su capacidadnan como entrenador y ta lamenta cu e relacion a termina den e forma aki.  Hasta Presidente, pa demostra esaki a logra haci palabrashonan cu e Technisch Directeur di Pec Zwolle di Hulanda, pa tanto Veron Albertsz y Glenn Sambo core stage pa 2 siman na Pec Zwolle den luna di februari proximo.  Banda di esaki tambe nan lo a haya oportunidad pa conoce e organisacion un tiki mas di aserca pa asina nan por tin un mihor bista di kico ta come y bebe pa cu nan funcion como entrenador.

  Durante e rueda di prensa aki, Presidente di AVB a pone bon cla cu ta sr. Albertsz ta esun cu a tuma su propio retiro y no ta asina cu ta bestuur di AVB a retira sr Albertsz for di su cargo como headcoach.  E prueba di esaki a wordo mustra tambe durante e rueda di prensa, por medio di un email cu sr Albertsz a manda pa AVB.   

  E email ta bisa textualmente sin kita ni pone: “Pa finalisa ami no ta interesa pa sinta cu ningun hende mas di bestuur.  Di AVB Mi palabracion ta caba dia 31 dec 2014.  Solamente mi kier pa AVB su bestuur bisa e hungadornan e situacion of ami lo bisa nan mane ami ta wak e cos”.

  E email aki a wordo manda dia 19 di december 2014 y mirando cu e grupo di U20 mester biaha dia 7 di januari, bestuur di AVB a dicidi di manda sr Albertsz un carta bek, gradiciendo su persona pa su trabao presta na AVB.  Pa loke ta trata e hungadornan cu a bin di Hulanda ta como lo siguiente.  E hungadornan aki ta yuinan di tera, esta Arubano pero cu ta bibando actualmente na Hulanda.  Di e ocho (8) hungadornan aki, un total di cinco (5) a hunga caba den e rondanan di eliminacion cu seleccion di Aruba.  Mas aun, di e dicho ocho (8) nan aki, siete (7) a wordo selecta pa e propio staf technico anterior.  Pues no por compronde dicon awe kier critica y tilda cu ta busca hungadornan Arubano for di Hulanda.  E criticanan infunda aki ta laga mustra manera cu ta AVB a inventa algo nobo door di a busca hungadornan Arubano cu no ta hunga localmente na Aruba, pa representa nos pais.  Pa aclarea e punto aki, ta bon pa menciona cu ta tur federacion di futbol rond mundo, ta busca nan mihor hungadornan pa representa e seleccion di nan Pais.  Manera por ehempel Leo Messi ta biba y hunga futbol na Barcelona, Spaña, pero e como Argentino ora di seleccion e ta hunga pa Argentina. Di e forma aki por duna miles di otro ehempel y pesey mes cu federacion di futbol Arubano esta AVB kier mustra riba e hecho cu no a haci nada robes of fuera di lo comun den e caso aki.  Por ultimo Presidente di AVB a menciona cu en berdad bestuur na dado momento a haye obliga na tuma e desicion pa pone e nombernan di e hungadornan di Hulanda ariba e lista di esnan cu lo ta forma parti di seleccion cu lo bai Jamaica door cu despues di varios peticion pa e staff technico entrega e lista cu nomber di hungadornan esaki no a tuma lugar. Hasta AVB a haya un boet di $3000,00 pa motibo cu no por e entrega e lista na tempo door cu staff technico no a entrega e lista na tempo.  Banda di cu e nomber mester tawata conoci na Concacaf, AVB a mester a reserva vuelo pa e hungadornan cu lo viaha pa Jamaica pa asina por sigura un lugar ariba e vuelo pa asina no core risico di no por yega na tempo pa e torneo, cu tur su consecuencianan financiero cu esaki por trece cune. Na varios ocashon e compania di viahe tabata pidi lista di nombernan di e hungadornan y hasta a menasa na dado momento cu lo cancela e reservacion y esaki pa AVB tabata inacceptable.  Pues ta pa motibo cu staff technico no tabata kier a entrega e lista AVB en todo caso a asumi su responsabilidad y a tuma e desicion cu e la tuma.  Por ultimo Presidente di AVB kier a reitira cu lo sera e capitulo aki y lo sigui focus ariba e retonan cu tin pa cu e seleccion U-20, especialmente despues di evaluacion cu a keda duna pa e staff technico cu a acompaña e seleccion U-20 na Jamaica, cual por cierto ta algo hopi precupante.

 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event