| 
La Roca a celebra dia di Betico na grandi PDF Print E-mail
Thursday, 29 January 2015
bolas-criollas-dia-di-betico.jpg E "hot spot" di ultimo tempo pa tur "private investigators", esta La Roca Rumshop na Moko, e lugar caminda "nan" ta wak bo pero abo no ta wak "nan", a organisa un tremendo torneo di bolas ariba dia di Betico diadomingo ultimo.

E torneo a ser teni tambe na recuerdo di defunto valuarte di La Roca, sr. Hector "Zabadayah" Ruiz, q.e.p.d.  Un torneo cu a haya bishita di tur skina di Aruba y cu a resulta den un dia sumamente alegre! Chicknan criollo y internacional a causa furor ariba y na banda di e cancha di bolas "kwihi-dome" di La Roca! Aki un y tur por a wak con "Moonchi" tabata manera "The Terminator" ariba cancha, y na banda di cancha tabata sumamente exitoso serca e "vrouwtjesnan” como "The Basilator"!  Dado momento e aroma di perfume Chanel Nº5 combina cu sodo di macho yen di testosterone a pone algun di e "bieunan” corda tempo di nan tempo den antaño ora di "bull-fight" bao palo di kwihi!!

  Bar y cushina tabata sumamente bon surti.  Mirando e competencia fuerte cu "Screamers-cash-only-bar" pafor bao palo di kwihi tabata duna e bar paden di Roly "enamoration" Ruiz, Roly a disidi di habri un "all-you-can-pay-bar" pa saka su dia combina cu'n workshop di kiko e protocol ta ora takelwagen tin cu tow abo y bo "date" hiba cas!

  Pafor e bataya entre bolicheros a cambia di cancha pa potlood cu papel ora cu varios integrante, bao guia di referee Luquitas "Panama Jack" Croes, mester a pasa un "rekentest" pa saka afo ta kiko ta nan "averahe".  Despues di a "google" kiko ta un "averahe", Croes-Malcounting cu hopi wiskunde, finesa, y "honestidad", a saka afo ta cua ta e dos teamnan cu ta bay final.  Mas cu logico cu e teamnan cu a cay afo bao e matematica implacable di "Lucas Einstein" no a keda mucho convenci, y dado momento tabata parse cu lo por bin un "grupo di 7-kwadraat"!!

  Pero, na final, refree implacable Lucas "ta-mi-ta-manda" Croes a convence un y tur cu su averahe ta esun corecto! Team "criollo" di Tico "A", Tico "P", y Flip Ras, lo enfrenta Team "corbaticas" consistiendo di Giovanni, Tico "D", y Mikel "Opname"! E final aki ta cuminsa bao animacion pisa di tur presente, pero ta parse cu aki si Team "Corbaticas" a haya un weso duro! Camera di seguridad a gara Tico "D" varios biaha ta hala e holoshi atras pa gana tempo, pero ni cu e "cheateria" aki team "Corbaticas" no por a scapa e "mega-derota" di 14-1 cu Team "Criollo" a pasa nan sin husa "doping"!

  Un biaha mas La Roca kier a gradesi tur su fiel clientenan y contribuidornan pa e tremendo celebracion di Dia di Betico cu e torneo di bolas mas loco den hemisferio occidental!! Zabadayaaaah!
 
< Prev   Next >
Benjamin Security NV
Compra
There are no upcoming events currently scheduled.
View Full Calendar
Add New Event