Allyson Ponson kier landa un final durante di e Weganan Panamericano na Toronto, Canada
Friday, 19 June 2015
ally.jpg E landando Allyson Ponson ta e unico atleta cu a clasifica cu un tempo “A” pa loke ta e Weganan Panamericano 2015 di Toronto, Canada.  

Actualmente Allyson ta studiando na Hulanda y ta forma parti di un di e mihor clubnan di landamento na mundo cu ta PSV.  Pa nos tabata net un bon momento pa combersa cu e atleta Allyson Ponson pa asina nos conoce mas di cerca y tambe puntre con ta bayendo cu e preparacion pa e Weganan Panamericano.

  Allyson Ponson na un edad hopi jong a cuminsa practica e deporte di landamento. Segun Ally e la bay pa obtene tur su diplomanan di landamento pero ora su rumannan a cuminsa practica e deporte cu seriedad e tambe e sigui nan paso.  E motivacion di Allyson tabata e otro atletanan di landamento cu a wak den Ally un prospecto y asina nan a cuminsa bise pa e join e ekipo.  Den prome instante Ally tabata gusta landa e 200m free, paso e ta dura mas hopi.  Pero poco poco e la mira cu den e 100m y sigur 50m e tabata crece cada dia y su temponan tabata baha considerablemente, aunke manera e mes ta bisa e 50m den cual awor e ta mihor, no tabata su disciplina faborito.  No tin duda cu e 50m a bira esun mas gusta pa Ally, esaki pa motibo cu e ta asina explosivo, unda bo adrenalina ta subi den corto tempo y tur hende tin asina cerca di otro cu bo no sa ken ta finalisa prome.  Un otro aspecto importante ta cu e momento ey bo kier ta esun di mas liher cu a landa.

  Ally a conta nos cu su prome aña na Hulanda a bay tremendo, e tabata tin varios exito cu su club PSV unda nan a gana algun competencia grandi na cual e tambe a forma parti di principalmente den relay.  E progreso den su landamento tabata bisto sigur den e distancia nan cortico cu ta e 50m y 100m free.  Sin embargo den su di dos aña, Ally no tabata tin e motivacion manera tabata e caso den e prome aña, esaki debi cu a cambia di coach y e no por a comunica bon cu e coach aki kende tabata pone Ally un banda y dedica mas tempo na e otro landadonan den e ekipo.  Esaki a haci cu Allyson a tuma e paso drastico di emigra bek pa Aruba y entrena pa un aña bao guia di coach di e seleccion nacional di Aruba, Ismael Santiestaban pa mira si e por logra clasifica pa e Weganan Olimpico di Rio 2016.  Mas cu claro Ally ta focus pa logra su estudio, unda e mester purba di caba e aña escolar y esey ta loke e lo bay haci tambe pa despues focus completamente pa e Weganan Panamericano como tambe e clasificacion Olimpico.

  Como landado Allyson tabata asina cerca di un medaya den e Weganan Centro Americano y del Caribe na Veracruz unda cu den e final e la sali na di cuater lugar den e 50m free.  Pa Ally esaki sigur tabata un dia memorabel paso e tabata asina cerca di un medaya pero manera e la bisa, e dia lo yega mirando su edad hoben ainda.  Aunke esaki tabata un bunita experiencia pero tog pa Allyson e momentonan mas memorabel pe ta ora e landa den relay como e ultimo landado y e publico ta cuminsa grita, e momento cu e bula den awa ta reina un silencio enorme unda e ta drenta su propio mundo, un sentimento masha dushi mes.  Ally su main focus ta e Weganan Olimpico di 2020, ey e lo kier explota y logra cosnan grandi pa Aruba.

ally_1.jpgally_2.jpg