Resultadonan di Campeonato Nacional Mountainbike 2015
Sunday, 12 July 2015
dsc_6238.jpg Diasabra 4 di juli 30 mucha y 58 adulto a competi pe titulonan maximo den e Campeonato Nacional Mountainbike 2015, organisa pa Aruba Wieler Bond (AWB). 

E careda a tuma luga na Ayo Rock Formation cu diferente ruta den mondi.

Esunnan mas chikito a competi mainta den 7 categoria. E ganadonan ta lo siguiente:

Idse Naber cu a sali miho mucha homber den e categoria 6-7 aña. Elias Vandormael ta e campeon nacional nobo den categoria 8-9 aña pa mucha homber y Lisiandra Kock a sali ganado di mucha muhe.

Den e categoria 10-11 aña Ryandra Kamperveen a sali campeon nacional bou di mucha muhe y Sean Walle a sali prome bou di mucha homber.

Den e categoria 12-14 aña di mucha homber e competencia tabata fuerte cu 13 participante. Finalmente Joshua Krozendijk a bay cas cu e titulo maximo. Bou di e mucha muhenan Zayra Felix a sali campeon nacional.

Ganadonan adulto

Atardi for di 3’or e adultonan a competi den 9 categoria. Den e categoria mas halto di Expert (17+) Jose Maduro a sali campeon nacional. Sandra Postma a sali campeon femenino den e categoria aki. Den e categoria Sportive (14-29) Ruson Gonzalez a gana y a sali campeon pre-junior. Siep ten Thije a caba riba di dos luga, sinembergo a bira campeon junior pa motibo di su edad.

Den e categoria Sportive Women Amanda Morales a gana y a sali campeon pre-junior. Annemarie Melchers a sali campeon den e categoria Master Women (30+).

E coredonan masculino por a competi den 3 categoria di Master: Everald Kock a gana y sali campeon den Master A (30-39). Campeon di Master B (40-49) a sali Edwin Hekman y di Master C (50+), Aat Hoek.

Den e categoria Beginners Men (no tabatin un grupo di coredo femenino) e competencia tabata fuerte bou di e 16 participante. Finalmente Norman Arends a sali campeon.

E comision di mountainbike di AWB kier gradici tur cu a yuda organisa e Campeonato Nacional 2015. Specialmente Tri-Bike y su team, Shoko Team, RadioShack, Speedworx CT, Crash Test Dummies Squad, FX Sports Bike Team, Velocity Cycling Team y Aerodynamic Cycling Team. Y tur e boluntarionan. Masha danki y te otro careda.