J&J JAWS TA GANA “DEATH MATCH” DEN COORSLIGHT BLACKBALL!!
Tuesday, 01 September 2009
Billiard050609 (2) (Custom).JPG
EAGLE -- Diasabra anochi e ora “zero” a bati pa dos team den e famoso COORSLIGHT BLACKBALL TOUR, esta e legendario team di Sta Cruz, TECHNICOS LA MODERNA, y e tribon brabo nan di Saliña Serca, esta J&J JAWS, bou liderasgo “de sluwe vos” Jos! Den un anochi rand rand di fanatico, pata pata di mamamento di gai y chuerchamento, e team relativamente nobo di J&J SNACK a logra pa prome biaha di drenta playoff door di tin net un tiki menos colio cu nan contrincante den un anochi cu lo mester drenta historia di billiard como “e anochi di Kaká”!!
Jairzinho Evereon di Jaws ta Sali hap na un moda feroz ariba Bubu Pourier, kende contrario na su tremendo wega di siman pasa, e anochi ey ta bay cas cu’n monster capoti pasa door di un Jairzinho tirando strak strak!! Cu 3-0 Jairzinho ta logra habri marcador pa J&J Jaws na 1-0!!
Pero Technicos ta manda un di su famoso burdugo nan, legendario Juancho Werleman, kende sin laga yerba krese ta manda Gutu Kelly lona plaaat abou cu 3-0!! Technicos ta empata na 1-1 y Gutu ta duna e prome signalnan cu e anochi aki aki lo ta un anochi di temblamento y yena pamper!!
Capitan di J&J Jaws ta manda Vi Frank enfrenta Darrick Wernet di Technicos, pero den corto tempo tur fanatico presente a keda convenci cu e anochi ey “lucky Viviano” ta solicitando pa un posicion den Real Madrid, pa ta mas exacto e posicion di “Kaká”!! Un holor fuerte ta plama n’e mes un momento door di Smooth Billiard y un y tur ta kere ta “Lucky” y laga bay, pero ta resulta cu ta un famoso hungado di Technicos a “download” mahos den baño di hende homber!! E atmosfera ta bira diki y ta corta rosea, mientras cu Vi ta kramp e mesa na un manera nunca bisto, regalando Darrick dos wega morto pa tabla na 2-2!! Den ultimo rack ambos hungado ta haya atake tras di atake di colio y por ultimo ta Darrick Wernet ta domina su tripa un tiki miho cu Vi y ta logra gana cu 3-2!! Technicos ta celebra nan bentaha di 2-1, mientras cu Total Cleaning ta hasi e desaster cu Vi a laga atras limpi!! Chèè!!!
E siguiente wega entre Eddy “gorilla” Flanegin y Sandro v/d Linde ta resulta otro bataya di come huña y colio!! “Gorilla” ta bay rapidamente dilanti cu 2-0, pero tembla tembla ta dal y Sandro ta empata na 2-2!! Den un berdadero “thriller” Gorilla ta logra e ultimo rack y J&J ta empata e partido na 2-2!! Den e partido di doubles no tin palabra pa describi con ganando na 1-0, Toto “Grand Canyon” Gei ta “choke” ariba un bola 8 morto morto!!! Tirso Jansen y Jerry Diaz ta empata y despues den un wega monstroso un biaha mas Tirso “Kadaster” Jansen ta demostra ta dikon Technicos ta cu’ne ainda!!! Tirso ta pasa midi cu waterpas y ta bank un bola 8 difisil pasa memei bolanan di J&J Jaws y plok e sensacionalmente!! Technicos La Moderna spectacularmente ta bay ariba cu 3-2 y e vloer di palo di Smooth ta casi bin abou di e bochincha cu Technicos ta hasi!! J&J Jaws no ta keda nada otro cu manda Jason “Friday the 13th” Kock den wega pa enfrenta otro legendario di Technicos, Carlos “sensei” Croes!! Den un tremendo partido Jason ta mustra Carlos caminda back pa Santana y ganando cu 3-1 Jason ta demostra cu esaki ta un new generation y tur Dinosaurus fossiel di billiard ta pertenese na Discovery Channel!! E partido ta bolbe empata spectacularmente na 3-3!!! Otro “killer” di J&J Jaws, e talentoso Dayron Franken, absolutamente ta mustra “no respect” pa polis y cu’n spectacular, sensacional, increibel shot pata pata yena cu pikete, Dayron ta hinca bola 8 via banda bashi y ta plok e bola poniendo J&J Jaws na top cu score di 4-3!!
Technicos cu lomba na muraya ta manda nan astro estelar Robbert Croes, y J&J Jaws automaticamente ta bai na “Plan B”, esta kima e momito …. Luis Araque, e tribon steroid, ya tabata den estado di descomposicion y ta wordo bari “kansloos” foi mesa cu 3-0 door di Robbertje. Technicos ta empata e wega na 4-4, pero ta keda sin cartuchi caliber pisa pa e ultimo set …..
Speransa di Technicos ta wordo deposita ariba Gino “Barbarossa” Ras, pero J&J Jaws ta manda su “killer shark” awa, nada menos cu  Win “the Winchester” Falconi, kende tirando shot tras di shot spectacular ta dobla Gino warda den baul de olvido cu score impactante di 3-0!!! Euforia total serca integrantenan di J&J Jaws kende nan porfin ta logra demostra cu nan ta material di playoff!! Mester duna ambos team un pabien pa con den un wega sumamente tenso y emocionante, a sa di mama otro su gai den un ambiente amical sin niun momento perde respet. Un palabra di elogio tambe na Technicos La Moderna pa e forma sportief cu nan a acsepta e hecho cu nan a lucha todo por todo, pero lamentablemente ta un ganado so por tin!!