| on Tuesday, 05 July 2011
|
Published in : , Noticia |
.JPG "TresComiteOlimpico (Custom).JPG")
Comite Olimpico Internacional a invita e tres Comitenan Olimpico Nacional di Reino Hulandes pa un reunion conhunto na Suisa riba diahuebs, 30 di juni, pa asina discuti e futuro participacion di atletanan di ex-Antiyas Hulandes na Weganan Olimpico y otro eventonan deportivo internacional.
Manera ta conoci, cu e cambio di e structura estatal cu a bira realidad dia 10 di oktober 2010, e situacion riba tereno deportivo tambe a cambia. Na nivel Olimpico, Antiyas lo perde e reconocimento di su Comite Olimpico (Nederlands Antilliaans Olympisch Comite – NAOC), despues di mas cu sesenta aņa. A base di e reglanan actual di IOC Corsow ni tampoco Sint Maarten por haya reconocimento pa un Comite Olimpico nobo, mirando cu e dos paisnan aki no ta independiente, loke ta un exigencia di IOC actualmente.
Na januari ultimo Comite Ejecutivo di IOC a dicidi cu atletanan di e islanan di ex-Antiyas por participa ainda na Weganan Olimpico di London na 2012 (bou di e bandera Olimpico), pero cu despues di esey nan mester scohe pa participa sea pa Aruba of pa Hulanda. Otro siman, durante e Session di IOC na Durban, Sur Africa, e miembronan di IOC lo wordo pidi pa dicidi tocante e proposicion di Comite Ejecutivo. Den seno di COA ta biba e opinion cu e decision di IOC lo nifica un desbentaha grandi pa Aruba y particularmente pa e deportista di Aruba, loke no por tabata e intencion.
Sinta na mesa, esnan presente di NAOC, di COA y di Comite Olimpico Hulandes (NOC*NSF) y tambe di IOC, a discuti e consequencianan di e desconocimento di NAOC. Tur esnan presente a reconoce cu e situacion actual ta sumamente complica y ta requeri mucho mas estudio y analisis. Den esaki e interes di e atleta ta primordial y mester ta na prome lugar. A reconoce tambe cu pa Weganan Olimpico no tin otro solucion cu loke ta wordo prescribi pa e constitucion di IOC, e Olympic Charter. Esey ta nifica cu Corsow y Sint Maarten no por conta cu un propio Comite Olimpico Nacional reconoci pa IOC.
Na mes momento a presenta diferente solucion alternativa pa loke ta e participacion di atletanan di e islanan di ex-Antiyas na Weganan regional y continental, cu a wordo ricibi positivamente. E proposicion tambe ta referi di participacion di atletanan na campeonatonan di nan deporte specifico.
A palabra finalmente cu lo analisa e proposicionnan y mira si nan ta posibilidadnan realistico. E organizacionnan lo keda den contacto cu otro y conhuntamente lo sigui busca e mihor solucion pa e situacion existente.
|
|
|
| Users' Comments |
|
Average user rating
 (0 vote)
|
|
Add your comment
|
.JPG "TresComiteOlimpico (Custom).JPG")