Riba 16 di april ultimo Joel Dirskz a sali rumbo pa Guatemala pa asina competi na e Campeonato Panamericano di Ciclismo Hubenil. Joel lo bai competi den 2 evento di cual e prome lo tuma lugar diasabra 28 di april y lo ta un Time Trial (contra holoshi) individual di 20 km y e otro lo ta diadomingo 29 di april cual lo ta un careda di ruta di mas o menos 105 km.

Paisnan invita na e Panamericano ta inclui tur paisnan di e continentenan Americano, pues for di Canada te cu Argentina y tambe tur e islanan den Caribe. E campeonato aki ta esun di e nivel regional mas halto pa e deporte di ciclismo, y solamente e mihor ciclistanan di 17 y 18 anja di cada país ta bai competi na e evento aki.

Joel Dirksz sin duda ta un di nos miho ciclistanan local y sigur den e categoria di Junior, pues di 17/18 anja. Joel ta e uniko atleta cu ta logra medaya di oro pa 2 anja consecutivo den e Youth Caribbean Cycling Championships den e evento di Time Trial. Localmente, Joel ta competi den e mesun categoria cu e Elitenan y e ta duna competencia fuerte na esnan cu tin hopi mas anja den e deporte di ciclismo.

Na 2011 tawata e prome biaha cu Aruba a participa na e Campeonato Panamericano di Ciclismo Hubenil y Joel mes ta esun cu a representa Aruba na dicho evento. Tawata su prome anja den e categoria Junior, y aunke e no tawata tin mucho experiencia ainda den carednan internacional, ela duna un tremendo prestacion na e Time Trial individual, saliendo na di 10 lugar y cu un tempo tawata den mesun paramite cu e top 5.

Joel a biaha mas trempan pa Guatemala pa asina e tin e oportunidad pa conoce e ruta y aclamatisa na e condicionan di Guatemala, mirando cu e careda lo tuma lugar na 1,500 meter riba nivel di lama. Cu su plan di entrenamiento den man, Joel a sali pa Guatemala pa asina cumpli cu e ultimo faceta di su entrenamiento.

Joel ta den training intensivo for di anja pasa cual a encera tambe varios careda internacional di fogeo cu a duna Joel haya mas experiencia pa core den peloton grandi. Joel su disciplina y dedicacion hunto cu su talento pa e deporte, ta locual a dune e derecho di por representa Aruba na un evento di tanto nivel.

Joel lo uni cu e coach nacional di Aruba Wieler Bond, Sr. Ervis Benitez-Martinez aya na Guatemala den e dianan prome cu e evento.

Aruba Wieler Bond den nomber di tur su miembronan ta desea Joel hopi exito na Guatemala y nos sa cu e lo hasi su miho prestacion posibel na e Campeonato.

Average user rating

   (0 vote)