Anualmente, riba e mesun dia y ora, full rond di mundo, ta wordo organisa un tour di ciclismo cu tin 3 proposito principal, cualnan ta: 1. Conmemora e memoria di ciclistanan cu a perde nan bida of a keda herida den un accident cu auto riba careteranan publico. 2. Concientisa tur automobilista cu ciclistanan tey riba caminda. 3. Pidi pa nos camindanan publico wordo comparti cu tur ciclista

Aruba no ta keda afo den esaki, y Aruba Wieler Bond tambe lo ta organizando su propio edicion di e Ride of Silence. E tour ta tuma lugar diaranson dia 16 di mei saliendo pa 7:00 pm for di e parkinglot di Arashi. E ruta lo pasa via Malmok, dilanti Tierra del Sol, sigui te na e crusada di Noord. Lo bira na man drechi pasa via Palm Beach y sigui te na e crusada di Wendy’s. Eynan ta bolbe bira drechi y pasa dilanti Marriott pa termina bek na e parking lot di Arashi. E ta un distancia di mas o menos 10 km. E tour lo wordo guía door di nos cuerpo policial.

E evento aki ta wordo cori riba un velocidad abou y den silencio y pues ta apto pa tur edad y nivel.

Tur ciclista tin mesun derecho y obligacion cu un automobilista riba nos camindanan publico. Pues manehadornan di auto mester respeta un ciclista riba caminda y trata di no causa e ciclista pa accidenta. Algun tips pa nos automobilistanan ora nan ta wak ciclistanan riba caminda:

- Baha velocidad.

- Pone atencion riba kiko e ciclista ta bai hasi.

- Ora di pasa un ciclista, tuma suficiente distancia y baha velocidad. Pasando duro y serca di un ciclista por cause pa perde balans y cai. Mas pio, bo spiel por dal e ciclista, cual por ta mortal pa e ciclista, dependiendo di e velocidad cu cual e auto ta core.

- No tuma chens pa sali dilanti un ciclista. Ta dificil pa calcula e velocidad cu cual un ciclista ta coriendo. Un top ciclista por yega velocidadnan te cu 60 km pa ora. Pues, no pensa cu ta paso ta un bais, e no ta biniendo duro. Warda e ciclista pasa, y despues subi e caminda.

Esaki ta algun cos simpel cu por yuda pa menos accident wordo causa cu ciclistanan. Awor mas cu claro, ciclistanan tambe tin cu cumpli cu tur regla di trafico incluyendo:

- Bisti helm na tur momento cu bo subi bo bicicleta. Aunke bo ta bai core poco poco. E helm tei pa proteha bo si acaso bo wordo alcansa door di un auto, of cai for di bais pa cualkier otro motibo. Pues no ta importa si bo ta core den un bike tour of den un careda; un helm ta keda semper obligatorio.

- Duna senjal cla di kiko bo ta bai hasi ora bo ta riba bo bicicleta. Bo ta bai bira rechts, of links? Bo ta bai cambia di lane? Semper duna indicacion cu bo man pa e automobilistanan rond dibo sa kiko ta bo intencionnan.

- Respeta lusnan di trafico y borchi nan di trafico. No pasa den lus cora, y no drenta den caminda verboden!

- Si ta core den atardi/anochi, mester core cu lus! Bisti panja color cla pa bo ta mas visibel pa automobilistanan.

Nos di Aruba Wieler Bond ta spera cu tur persona tuma e tipsnan aki na serio y pone nan den practica.

AWB ta finalisa cu un invitacion pa TUR hende cu tin bais, sea ta di ruta, mountain bike, BMX, of leisure bike, pa bin tuma parti na e Ride of Silence. Lus di bais lo no ta rekeri, mirando cu nos lo core bou guia di Polis y EMS. Locual si ta rekeri ta un helm. Sin helm, bo lo no wordo permiti pa start cu e grupo.

Lo no tin costo di inscripcion, y na final di e anochi, lo tin algo di bebe pa refresca.

Pues bini uno bini tur, trece ful e famia pa un actividad cu tin hopi beneficio pa e curpa humano. Mas grandi e grupo ta, mas grandi e impacto lo ta. Nos lo sali pa 7 pm en punto, dus mester tey presente pa 6:45 pm mas tarda. Nos ta wardabo. Pa mas informacion di e evento aki, por tuma contact cu Aruba Wieler Bond via This e-mail address is being protected from spam bots, you need JavaScript enabled to view it of celular 6-900-400. Tambe por bishita nos website www.arubacycling.net.

Average user rating

   (0 vote)