Aruba a conquista bronze den campeonato Panamericano y Sudamericano di BMX 2013 na Argentina
Wednesday, 22 May 2013

BMX.jpg
Dianan 12 pa 14 di mei a tuma lugar e magno evento di BMX pa e continente Sur Americano. Esaki tawata e UCI BMX Panamericano y Sudamericano 2013. E campeonato nan aki a tuma lugar na Santiago de Estero, Argentina. Un record di 683 deportista di 12 diferente país di e continente a hasi participación na e categorianan challenge.

Aruba tambe a hasi participacion na e campeonato nan y e delegación tawata consisti di e atletanan Aschwin Dabian y e dos rumannan Zaithyel y Zyqion Soekandar.
Aschwin Dabian y Zaithyel Soekandar a representa Aruba den e categoría Expert 16 anja y Zyqion Soekandar den e categoría Expert 15 anja
Den categoría di Zyqion Soekandar, a inscribi un total di 42 coredor. Zyqion a core tur su motonan di qualificacion na promer lugar. Di quart final y semi final e la pasa pa e finalnan unda ela conquista bronze. Esaki pa tur dos campeonato esta e Panamericano y Sudramericano. Zyqion tawata e figura máximo di e delegación chiquito di Aruba cu a subi pódium tur dos campeonato.
Zaithyel Soekandar tambe a core den un categoría grandi y sumamente competitivo di 56 participante y a logra qualifica tur su caredanan na promer lugar. Den e campeonato Panamericano un poco mala suerte a toke den quart final na momeno cu e tawata na di 2 posicion y ta cai. Asina pues Zaithyel no a logra avanza pa semi final. Pa loke ta trata e campeonato Sudamericano tambe ela qualifica tur su caredanan na promer lugar y a pasa fasilmente pa quart y semi final na promer puesto ganando asina simpatía di publico y tawata favorito den su categoría pa e careda final. Den e careda final e la gana bronze y tambe a subi pódium.
Aschwin Dabian a competi den mesun categoría cu Zaithyel y tambe a hasi un tremendo prestación. Den e campeonato Panamericano e la qualifica su caredanan den e promer 4 puestonan como tambe su careda quart final y a avanza pa semi final. Den e careda semi final Aschwin a yega na di 5 puesto y no a pasa final. Den e careda Sudamericano Aschwin a qualifica tur su caredanan clasificatorio na promer lugar y asina a hala hopi atención di publico pa país Aruba. Den quart final e careda no a bai mucho bon y e la termina na di 5 posicion y no a avanza pa semi final.
E deporistanan di BMX arubiano a cumpli di un forma sobremanera cu nan obhetivo y dos a finalisa riba podium di e campeonato Panamericano y Sudamericano. Sin embargo tur tres deportista a sorprende esnan presente cu nan prestación y a hala hopi atención tanto di publico y di media ya cu e delegación tawata consisti di solamente 3 participante y tur 3 participante a destaca den e bueltanan clasificatorio y a logra yega pódium. Aruba a wordo reconosi pa e corant di Santiago de Estera y a haya un sección den e relato di resultado di e campeonatonan.
Awo e deportista nan ta bek na Aruba den preparación intensivo pa e mundial di BMX cu lo ta den luna di juli na New Zealand.
Pabien na e atletanan cu nan logro na Argentina y éxito cu e preparación pa e Mundial di BMX 2013.