Seleccion hubenil di ciclismo ta cla pa weganan ODESUR hubenil
Tuesday, 17 September 2013
DSC_0206.jpg E prome edicion di e Weganan ODESUR hubenil lo tuma lugar na Lima, Peru entre 20 y 29 di september proximo. Comite Olimpico Arubano ta mandando un delegacion di 20 atleta hoben pa representa Aruba den varios deporte.  Ciclismo tambe ta forma parti di e delegacion aki cu un total di 6 atleta: Aschwin Dabian, Zaithyel Soekandar, Cherley v/d Linden, Oriana Thielman, Eugene Dirksz y Jonathan Croes. Nan ta atletanan di 16 y 17 aña cu tin e gran tarea pa representa e deporte di ciclismo pa Aruba na e Weganan.

  E formato di competencia lo ta diferente na locual nos conoce, na unda cu lo no premia cada disciplina separa, pero mas bien lo ta e acumulacion di punto den 3 diferente evento cu lo determina e pais ganador den e eventonan Masculino, Femenino y Relay/Mixto. Pues un total di 3 oportunidad pa por competi pa un medaya.

  E delegacion lo ta biahando 17 di september y nan ta wordo acompaña pa e entrenadornan nacional, Pedro Estaba y Ervis Martinez-Benitez, kendenan a bin ta hasiendo un tremendo trabouw pa cu e preparacion di e atletanan.

21 di september lo start cu e competencia di BMX, na unda Aschwin y Zaithyel lo percura pa acumula mas punto posibel pa Aruba den e categoria Masculino.

22 di september lo tin e careda di Ruta unda Eugene y Jonathan lo ta na turno pa duna Aruba mas punto den e ramo masculino, mientras Cherley y Oriana lo percura pa haya punto pa Aruba den e categoria Femenino.

23 di september lo tin e careda di Mountain Bike, y aki un biaha mas Eugene, Jonathan, Cherley y Oriana lo purba pa trece suficiente punto pa Aruba tanto den categoria Masculino como Femenino. Na final di e careda di MTB lo tabula e puntonan di e 3 eventonan (BMX, Ruta y MTB) y asina saca e paisnan ganador den Masculino y Femenino.

gallery1gallery1gallery1

24 di september lo sigui cu evento di Relay cual lo ta un time trial. Aruba lo tin 2 team cu lo consisti di 1 mucha homber y 1 mucha muhe. Pues un biaha mas Eugene, Jonathan, Cherley y Oriana lo tin e tarea pa acumula punto pa Aruba, e biaha aki pa e categoria di Relay/Mixto.

25 di september lo sigui cu e siguiente evento di Relay, pero den MTB. Eugene, Jonathan, Cherley y Oriana lo hasi nan ultimo atentado pa logra mas punto posibel pa Aruba. Despues di e careda aki, lo acumula e puntonan di e 2 eventonan di Relay y asina saca e paisnan ganador den e categoria Relay/Mixto. 

E formato aki ta hasi e factor di Team Work algo sumamente importante. Tur e atletanan tin cu duna lo maximo pa asina Aruba (y no un atleta individual) haya e maximo cantidad di punto pa logra un posicion riba podium.

  E tarea lo no ta facil, mirando cu nan lo competi contra paisnan grandi na unda e nivel di ciclismo ta hopi halto, por ehempel Colombia, Argentina, Brazil y demas paisnan di Sur-America.

  Sin embargo, e preparacion di e atletanan aki tawata uno intensivo y AWB tin tur confiansa cu nan lo sa di representa nan pais dignamente. E atletanan hoben aki a hasi hopi sacrificio pa nan yega na e nivel aki y nan ta sintinan mes cla pa e reto.

  AWB ta gradici Comite Olimpico Arubano, Comishon di subsidio, mayornan, entrenadornan, e teamnan y tur fanatico cu ta apoya nos atletanan.

  E evento aki lo culmina e macro ciclo actual di preparacion pa e equipo hubenil, cual a bin ta tumando forma for di aña pasa na november.  Despues di e evento aki, lo tin un periodo di descanso y adaptacion.  Na october lo bolbe cuminsa bek cu preparacion pa e Junior Panamerican Championships cual lo ta den april 2014 y e Junior Caribbean Cycling Championships 2014 na juli di 2014.

  Pa keda na altura di e prestacion y resultadonan di nos atletanan por “like” nos facebook page “Aruba Wieler Bond”.