Seleccion Nacional Femenino di Aruba den pleno preparacion pa Campeonato di CONSURSA
Tuesday, 22 July 2014
selecion_zydha_catching.jpg Aruba Softball Bond ta preparando su selecion Femenino pa asina nan por competi den Campeonato di CONSURSA cual lo tuma lugar di 2 pa 9 di Augustus proximo na Bogota, Colombia.

Presidente di Aruba Softball Bond como miembro di directiva di CONSURSA a splika cu cada dos aña di acuerdo cu Statuto di CONSURSA mester organisa entreotro un campoenato Femenino pa paisnan miembro.  Na 2011 Peru a gana e bidding pa organisa e Campeonato aki pero lastimamente na April ultimo Peru a distancia di esaki pa rasonnan financiero cu nan stadion cu standardnan international cumpliendo cu reglanan vigente di ISF no lo bin cla na tempo.  Minister di deporte di Colombia final di April a pone su schoudernan un biaha mas bou di esaki pa salvaguardia desaroyo di deporte y a pone fondonan disponibel di acuerdo cu statuto di CONSURSA.  Selecion Femenino di Aruba desde Mei ta den pleno preparacion y promer siman di Juni a hunga 5 wega contra un equipo di College USA unda nan a gana e serie 3-2 cual ta un bunita resultado.  E elenco di staff ta consisti di Octavio Cajigal, Rayborn Didder, Lucio Geerman y Henk Arnold kendenan a encarga cu e entrenamento.  Mester bisa cu e atletanan ta riba training 4 ves pa siman.  Tur Dialuna, Diamars, Diahuebs di 7- 9:15 p.m na Pos Chiquito y tambe diasabra 10 a.m pa 12 p.m.  Trainingnan ta habri pa publico cu kier sigui e seleccion di serca. Aruba Softball Bond a sigui splica cu a yama un pre seleccion di 24 hungador pero awor e 17 hungadornan oficial ta conosi y ta trahando fuerte.   Averahe asistencia di training ta coriendo den un ratio di 95% cual ta uno hopi bon.  E animo y Amistad entre hungadornan ta grandi y alegre y ASB ta sinti cu si continua riba e trayecto di preparacion aki Aruba lo sa di gana diferente wega y ohala clasifica y bin cu medaya.  Softball ta den pleno desaroyo.

img-20140718-wa0001.jpgimg-20140718-wa0002.jpgsel_dayene_catching.jpg