Despues cu nos delegacion den e deporte di Mountain Bike a bishita e ciudad di Guiyang, China unda nan a participa na un evento internacional yama Guiyang International MTB Invitational Tournament, nos a dicidi di tene un entrevista cu un miembro di e delegacion pa asina comparti su experiencia cu nos lectornan. Pa henter e delegacion e tabata un experiencia grandi

1. Conta nos di bo experiencia na Guiyang China?
E experiencia na e Guiyang International MTB Invitational Tournament tabata inmenso. Hopi bon organiza, hende hopi amabel y hospitalario lagabo sinti bo mes na cas. Un cobertura total den full e pais, via tur medio di comunicacion. Tur detaye nan a pensa riba dje por ehempel e sticker nan pa maleta. E Opening Ceremony tabata algo grandi cu tur e main sponsor nan presente y e gobierno di Guiyang. E show tabata manera un MTB Olympics, hopi bon mes. E careda mes ta di e nivel di mas halto cu tin den MTB, e ta wordu considera un C1 cu ta e nivel di mas halto y ta pesey a bin hopi team nan professional manera Rabo Bank y BMC y tabata tin 30 pais presente cual Aruba ta e unico di Caribe. E ruta ta un ruta cu nos niun no conoce aki na Aruba, dus e tereno, dificultad technico y subidanan hopi exigente y subida y bahada nan tambe hopi duro technico y caminda cu algun bahada tin drops di hasta 3 meter.
E careda aki a wordu haci pa promove mountain bike na China y tur pais rond di mundo a wordu invita. A keda na cada un pa acepta y asisti mirando e hecho cu e organizador nan ta paga cu tur gasto nan, incluyendo pasashi pa 5 hende, estadia di 4 anochi pa 5 hende, 3 cuminda pa dia pa cada un, transporte di baisnan, transporte na hotel y vise versa pa e careda. Si ta necesario hasta un tour dor di e ciudad por a haya inclui. Dus e ta un oportunidad cu Aruba no por a laga afor. E careda a wordu filma live pa full China wak (1.5 billion hende), na Guiyang tin 5 million. Team Aruba consistiendo di mi persona y 2 atleta elite: George Winterdal y Zaida Everon, nos mes a cubri otro gasto nan cu e organisadornan no ta cubri cual ta e Visa pa drenta China cual mester a paga un persona pa bai busca nan na Venezuela pa nos y tambe mester a paga un seguro di viaha pa por a haya e visa nan y e gasto nan di transporte di bais viahando cu KLM cu no ta barata y aki e 2 atleta nan mes mester a cubri e gastonan aki. Federacion di ciclismo di Aruba a bisa nos cu ta gasto nan cu nos mes mester paga aunke cu nos ta representa Aruba y Aruba Wieler Bond. E gasto di transporte di e bais nan lo wordu reembolsa dor di e organizador nan asina nos manda e recibonan. Voor de rest e evento aki cu tabata hopi bon organiza tabata un experiencia inolvidabel pa nos tur.

2. Kiko bo a sinja di e careda na China?
Ma sinja hopi di e careda aki mirando cu mi team Tribal Cycling Club ta organiza e careda nan di mas exigente y mas grandi na Aruba, cual dos ta internacional. Mirando e organizacion di e careda na Guiyang ma wak con professional nan ta traha pa un careda di MTB. Ma cana full e ruta di e careda cu ta 5 km y canando mes na un altura di 1250 meter ta hopi dificil na e subida stijl y bahada nan tambe cu e drop down nan di 3 meter bo ta ripara ta con halto e nivel di e careda aki ta. Tur loke ma wak na evento y experencia mi lo bai aplika na mi team su careda nan den futuro. Ma conoce hopi hende cu por juda Aruba progresa den MTB y lo por tin e posibilidad di haya oficialnan di UCI pa bin Aruba y evalua nos rutanan di MTB y duna nan un nivel y asina ns por sa riba ki nivel nos ta bezig ta compitiendo y con pa subi e nivel pa den futuro nos atleta nan por cualifica pa competi na un World Championship. Cual mi tin cu bisa tambe cu e circuit na Guiyang ta bai ta e circuit di e World Championship MTB 2013.

3. Con Aruba por hisa e nivel di MTB despues di un experiencia unico na China?
Nivel di MTB na Aruba por subi unicamente cu mas training y adaptando circuito y ruta nan mas exigente pa asina tur atleta por train y mehora nan techniek y costumbra cu ruta nan mas dificil pasobra na un Panamericano nan no ta bai haci e ruta facil pa bo, ta abo como atleta mester train y mehora bo techniek pero riba ruta nan mas dificil manera esun di nos careda proximo cu ta dia 7 di oktober cu ta e Highway To Hell circuit. Asina mes e circuit ey por wordu adapta pa hacie mas dificil. Tambe atleta nan por mehora bayendo caredanan afor manera na Venezuela, Puerto Rico y Ecuador y asina experiencia diferente ruta y terenonan pa asina mehora nan mes den nan deporte di MTB. Tambe aki na Aruba nos tin rutanan pa haci caredanan di caliber manera un World Cup.

4. Nos ta ripara cu MTB ta un deporte cu a crece enorme na Aruba, Dicon bo persona ta kere esaki?
MTB a crece masha hopi mes compara cu 4 anja pasa cu ami mes a cuminsa. Tur esey ta bin dor cu hende nan ta bira mas conciente di nan salud y tambe dor cu nos team Tribal Cycling Club ta bin ta organizando pa 4 anja caba practicamente tur luna nos famoso Full Moon MTB Tour cu a crece hopi cu nos a yega e record di 125 participante. E luna aki dia 26 nos lo tin e tour aki atrobe y e ta yuda hopi hende cu kier cuminsa core pa haya e push pa cuminsa y conoce otro nan cu ta practica e deporte aki y asina nan tambe ta haya e gana pa sigui train y hasta despues bira competitivo den e deporte. Tambe e ayudo di Gobierno poniendo un Ciclovia tur siman recientemente ta yuda crece e deporte nan. MTB ta mas sigur den e sentido cu tin menos trafico di motor unda bo ta core cu un MTB compara cu un bais di ruta cu ta riba asfalt constantemente. Y e seguridad ey un persona ta busca pa e por haci su deporte y asina aki e seguridad ey ta yuda tambe cu MTB ta asina grandi awe.

5. MTB ta un deporte costoso! Dicon abo como lo conseha hendenan pa praktica e deporte di MTB?
MTB por ta costoso ora bo ta un atleta na un nivel pa competi afor. Pesey lo ta bon pa sponsor nan por wak esey y asina yuda e atleta nan yega nan metanan pa competi afor. Un persona cu kier practica e deporte di MTB por hacie den diferente nivel cuminsando na Beginners y Recreational y despues competitivo. Tin bais nan di bon calidad pa menos di mil florin y di mes dependiendo di loke bo kier e prijs por subi a consecuencia di e componente nan riba e bais cu ta cambia. MTB ta hopi bon pa bo salud pasobra e ta traha riba bo systema cardiovascular y tambe pa fortaleza bo musculo nan dor cu bo tin cu uza forza pa por core bais aki riba un tereno off road.

Na final e delegacion kier a gradeci Tribike Aruba pa suministra nos dos atleta nan cu un uniform di Aruba cada un y tambe na  ATA pa e propaganda nan di Aruba
E organisadornan tabata masha contento mes pa tin nos eynan, nan a asepta nos y aplaudi nos y con nos a sera amistad y interambia cu diferente pais, esey ta hopi importante y cu no a costa Aruba niun cen pa tur e exposure ey na un pais di 1.5 Billion hende
Delegacion a aserca ATA y meneer Mario Arends, kende ta Branding and Advertising specialist a juda e delegacion cu diferente give-aways pa promove Aruba. Natasha y Ralph Maduro cu a percura pa e logo Aruba a duna e delegacion nan uniform pa e ceremonia di apertura y Gert van Vliet di Tribike Aruba a percura pa e cycling jersey di Aruba.

Te asina leu nos entrevista cu miembro di e delegacion Arubano, Sr Michael Stamper cu recientemente a participa como support member na un careda internacional di MTB na e ciudad di Guiyang China. MTB un deporte sigur birando grandi na Aruba. Dia pa dia nos ta mira mas persona subi nan MTB y recore nos dushi isla di Aruba. Un palabra di pabien na tanto Michael como tambe e dos atletanan cu a participa na e careda esta Zaida y George
(multithumb)