E Open Games a cuminsa riba dia 27 di Februari; e penultimo edicion ta diasabra, dia 21 di Maart y otro siman, dia 28 di Maart ta tuma lugar e ultimo competencia di e serie aki.  Pa un luna largo e top atletanan di Aruba ta competiendo contra otro pa diferente premio y pa e gran final lo tin premionan cash pa e atletanan cu keda na e di prome, di dos y di tres lugar.

 Esaki ta un reto manera ningun otro y e recompensa pa e atletanan cu resulta den e top posicionnan durante di e Open Games ta nan participacion como miembro di team CrossFit 297 na e campeonato regional, CrossFit Regionals.  E atletanan cu logra keda na e top di e competencia ey lo competi den un di e competencianan di mas renombre mundialmente, esta Reebok CrossFit Games na luna di Juli 2015.

  Actualmente tin miles di persona competiendo na e CrossFit Open den paisnan rond mundo.  CrossFit 297 ta invita comunidad di Aruba pa pasa bishita e Open Games, sigui e progreso di nan atleta faborito y gosa di e competencia cu ta un muestra di forsa y energia.

  E final di e Open Games ta tuma luga otro siman diasabra y ta premira cu esaki lo bira un competencia hopi fuerte, unda cu atletanan lo duna "todo por todo" pa sali na "top" di e competencia. 

  CrossFit ta un programa di forsa y condicion di e curpa cu tin como meta pa mehora e rendimento cardiovascular/respiratorio, stamina, forsa, poder, velocidad, coordinacion, agilidad, balansa y precision.  Atletanan ta siña conoce nan curpa y kico nan ta capaz di dje, como tambe con e ta desaroya pa medio di un mix di entrenamento y ehercicio aerobic, gymnasia y hisamento di peso.  E programa aki ta wordo uza na scolnan di polis y pa militarnan, atletanan top di arte marcial y hopi otro atletanan di taya mundialmente.