Cada cuater aña dicho weganan ta tuma luga mientras e aña aki e ciudad di Toronto, Canada, a toca turno pa host e di 17 edicion di e Weganan Panamericano.

  Manera semper e participacion di atleta lo ta uno grandisimo unda alrededor di 6500 atleta for di 41 pais di nos continente lo haci nan maximo esfuerso defendiendo e bandera di nan pais.

  Nos dushi isla di Aruba tambe lo forma parti di e Weganan Panamericano di Toronto 2015.  Pa mas di un ciclo nos atletanan elite ta preparando duro pa e diferente weganan den nos region y continente manera e Weganan Suramericano (Odesur) y Centro Americano y del Caribe sin lubida e propio competencianan internacional cu e atletanan ta participa na dje.

  Cu grato placer COA a anuncia cu e aña aki e delegacion di atleta lo ta esun mas grandi di historia.  Es mas, tur e atletanan aki a pasa e proceso di clasificacion, algun pa medio di acumulacion di puntuacion pa asina logra yega Weganan Panamericano, otronan pa medio di un resultado sobresaliente den torneonan clasificatorio, algo sigur historico.  Loke ademas ta remarcable ta cu, caminda cu cuater aña pasa Aruba su delegacion tabata consisti di atletanan den cinco deporte, e biaha aki no menos cu dies deporte, pues dobbel e cantidad di deporte, compara cu na Guadalajara 2011, a logra gana e derecho di participa na e weganan continental.

  Desde inicio di e Weganan Panamericano dia 10 di Juli te cu e ultimo dia 26 di Juli, un total di 25 atleta den 10 diferente deporte lo midi forsa contra e mihor atletanan di e continente America.  No tin duda cu nos dushi isla di Aruba por conta riba un representacion digno den e Weganan Panamericano di Toronto 2015.

  Siguientemente nos ta presenta e nombernan di nos representantenan den e di 17 edicion di e Weganan Panamericano 2017.

Landamento: Allyson Ponson, Daniella van den Berg y Jordy Groters

Landamento sincronisa: Kyra Hoevertsz, Anouk Eman, Kiara van Trikt, Alexandra Mendoza, Carondina Leijdekkers, Neftaly Albertsz, Abigail de Veer, Amanda Maduro y Janelle Flemming

Atletismo: Quincy Breell

Beach Volleyball: Mitchel Daniel y Eargenell de Cuba

Bowling: Kamilah Dammers, Thashaina Seraus, Jason Odor y Bryan Helmeyer

Ciclismo – BMX: Zaithyel Soekandar

Hisamento di Peso: Jennifer Piter

Sailing - Laser Radial: Philipine van Aanholt

Triathlon: Renze Postma

Taekwondo: Monica Pimentel Rodriquez y John Jairo Maduro

  Di aki banda e famia di Comite Olimpico Arubano y Aruba completo kier a desea nos atletanan tur clase di exito den e Weganan Panamericano Toronto 2015.